Ձեր վստահելի աղբյուրը

«Մի կարևոր կոնսենսուս կա առ այն, որ ապաշրջափակման գործընթացը սկսվում է Երասխ-Հորադիզ երկաթգծի վերաշահագործումից, ինչը, կարծում եմ, կարևոր է, որովհետև կոնկրետ է և շատ հասկանալի, թե ինչի շուրջ է խոսակցությունը։ Խոսակցությունը երկաթգծի մասին է»,- լրագրողների հետ զրույցում ասաց փոխվարչապետ Մհեր Գրիգորյանը։

Նա կարծում է, որ կա վերջնական ընկալում, որ կարգավորումները պետք է լինեն իրավազորության և ինքնիշխանության ներքո այն երկրների, որոնց տարածքով երկագիծն անցնում է. «Դա էլ է շատ կարևոր և ֆունդամենտալ համաձայնություն: Մնացած հարցերի շուրջ դետալներ չեմ բացահայտի, որովհետև դեռևս վերջնական կոնսենսուս չկա»։

Ճշտող հարցին՝ Բաքուն համաձայնե՞լ է այս նշած տարբերակի հետ, փոխվարչապետը պատասխանեց. «Կարծում եմ՝ այո, որովհետև մենք բազմիցս հայտարարել ենք, որ այդ հարցը որևէ այլ ձեւաչափով չենք քննարկելու: Եվ եթե, այնուամենայնիվ, կան քննարկումներ, հանդիպումներ, նշանակում է՝ այդ ընկալումը կիսում են առնվազն մեր եռակողմ աշխատանքային խմբի բոլոր մասնակիցները»:

Հարցին՝ կա՞ մի կետ, որի շուրջ հայկական և ադրբեջանական կողմերն ունեն հստակ դիրքորոշում, որ երկու կողմն էլ համաձայն են ճանապարհների ապաշրջափակման հետ կապված, նա պատասխանեց. «Երկաթգծի Երասխ-Հորադիզ հատվածի վերաշահագործումը որպես առաջին փուլ, կարծում եմ, վերջնական կոնսենսուս  կա: Բոլոր կողմերը հայտարարել են, որ համաձայն են և կիսում են, որ դա այս պահի համարն որպես առաջնային հնարավոր պոտենցիալ պայմանավորվածություն լավ և դրական լուծում է տարածաշրջանի և բոլոր երկրների համար»:

Ըստ նրա, միանշանակ է, որ Հայաստանի տարածքով անցնող երթուղիները վերահսկվելու են համաձայն Հայաստանի օրենսդրության: Հարցին, թե այդ դեպքում ինչո՞ւ է ռուսական ФСБ-ն կանգնելու այդ ճանապարհին, նա արձագանքեց. «Իսկ ձեզ ո՞վ է ասել, որ ФСБ-ն կանգնելու է: Նախ, եկեք խոսենք ФСБ-ի կազմում գործող սահմանապահ զորքերի մասին, որպեսզի հստակ լինենք, թե ինչի մասին է խոսքը, եթե դուք մեջբերում եք նոյեմբերի 9-ի հայտարարության 9-րդ կետը: Երկրորդ, գործառույթի իրականացման ձևի մասով դեռևս քննարկումներ պետք է լինեն»:

ՀԱՊԿ-ի հետ ունեցած խնդիրների մասին հարցին ի պատասխան , նա ասաց. «Խնդիրները, որոնք կան, ծանոթ եք և դրանց մասին մենք խոսել ենք հրապարակային: Բոլոր արձագանքներն այդ խնդիրների հետ կապված եղել են հրապարակային: Հիմա դա ինչ նշանակություն կունենա և ինչ հետևանք կառույցի համար, խնդրում եմ՝ ինքներդ գնահատեք»։

Հարցին՝ Հայաստանը մտածո՞ւմ է ՀԱՊԿ-ին անդամակցությունը դադարեցնելու կամ առժամանակ սառեցնելու մասին, նա ասաց. «Նմանատիպ բոլոր հարցերը հանրային պաշտոնական դիրքորոշումների տիրույթում պետք է նայել»:

Լրագրողի դիտարկմանը՝ տեղեկություններ կան, որ որոշ ժամանակ առաջ Անվտանգության խորհրդում սառեցման հարց է քննարկվել, նա ասաց. «Անվտանգության խորհրդում քննարկվող հարցերը հրապարակային են այնքանով, և մենք խոսում ենք դրանց մասին այնքանով, որքանով այդ հարցերը կարող են հրապարակային լինել: Որևէ այլ հարց ես ոչ կհերքեմ, ոչ կհաստատեմ»: