Ձեր վստահելի աղբյուրը

Իրավաբան Գարեգին Պետրոսյանը գրում է.

«Այսօր «Ազգային ժողովի կանոնակարգ» սահմանադրական օրենքի ուժի մեջ մտնելուց հետո առաջին անգամ մահացել է Ազգային ժողովի գործող պատգամավոր: Թվում է, թե առաջացած թափուր տեղի լրացման առումով խնդիրներ չեն կարող առաջանալ. կկազմվի պատգամավորի լիազորությունների դադարման մասին արձանագրություն, որը կստորագրի Ազգային ժողովի նախագահը և մեկ շաբաթվա ընթացքում կուղարկի Կենտրոնական ընտրական հանձնաժողով: Արդյունքում համամասնական ցուցակի հաջորդ համարը կդառնա պատգամավոր: Արդյո՞ք ամեն ինչ այդքան պարզ է:

Սահմանադրության 98-րդ հոդվածի 1-ին մասի համաձայն՝ պատգամավորի լիազորությունները դադարում են Ազգային ժողովի լիազորությունների ժամկետն ավարտվելու, Հայաստանի Հանրապետության քաղաքացիությունը կորցնելու կամ այլ պետության քաղաքացիություն ձեռք բերելու, նրան ազատազրկման դատապարտելու վերաբերյալ դատավճիռն օրինական ուժի մեջ մտնելու, նրան անգործունակ, անհայտ բացակայող կամ մահացած ճանաչելու վերաբերյալ դատարանի վճիռն օրինական ուժի մեջ մտնելու, ՆՐԱ ՄԱՀՎԱՆ, հրաժարականի դեպքերում:

«Ազգային ժողովի կանոնակարգ» սահմանադրական օրենքի 154-րդ հոդվածի համաձայն՝
1. Պատգամավորի լիազորությունները դադարում են, եթե՝
1) ավարտվել է Ազգային ժողովի լիազորությունների ժամկետը.
2) նա կորցրել է Հայաստանի Հանրապետության քաղաքացիությունը.
3) նա ձեռք է բերել այլ պետության քաղաքացիություն.
4) նրան ազատազրկման դատապարտելու վերաբերյալ դատավճիռն օրինական ուժի մեջ է մտել.
5) նրան անգործունակ, անհայտ բացակայող կամ մահացած ճանաչելու վերաբերյալ դատարանի վճիռն օրինական ուժի մեջ է մտել.
6) նա տվել է հրաժարական:

2. Պատգամավորն իր հրաժարականը ներկայացնում է Կանոնակարգի 155-րդ հոդվածով սահմանված կարգով:

3. Սույն հոդվածի 1-ին մասի 2-ից 6-րդ մասերով նախատեսված դեպքերում՝ համապատասխան փաստաթղթերի հիման վրա, կազմվում է պատգամավորի լիազորությունների դադարման մասին արձանագրություն, որն ստորագրում է Ազգային ժողովի նախագահը և մեկ շաբաթվա ընթացքում ուղարկում է Կենտրոնական ընտրական հանձնաժողով:

Սահմանադրությանը համապատասխան ընդունված Կանոնակարգը պետք է 154-րդ հոդվածում նախատեսեր նաև պատգամավորի մահը՝ որպես նրա լիազորությունների դադաման հիմք, սակայն «մոռացել է»: Այս բացթողման մասին Կանոնակարգի նախագծի քննարկման ժամանակ նշվել էր ԱԺ աշխատակազմի իրավաբանական վարչության եզրակացության մեջ՝ Սահմանադրությանը համապատասխանության հատվածի 5-րդ կետում. ձայն բարբառո անապատի (հղումը դրված է առաջին մեկնաբանությունում, այդ կետում նշված՝ Նախագծի 168-րդ հոդվածի 1-ին մասը համապատասխանում է այսօրվա Կանոնակարգի 154-րդ հոդվածի 1-ին մասին):

Սահմանադրության 6-րդ հոդվածի 1-ին մասի համաձայն՝ պետական և տեղական ինքնակառավարման մարմիններն ու պաշտոնատար անձինք իրավասու են կատարելու միայն այնպիսի գործողություններ, որոնց համար լիազորված են Սահմանադրությամբ կամ օրենքներով:
Հետաքրքիր է՝ ո՞ր օրենքով է ղեկավարվելու Ազգային ժողովի նախագահը համապատասխան արձանագրությունը կազմելիս:
Հ.Գ. Մեր առաջարկությունները պետք էր ընդունել»։