Աննախադեպ տեղումները որոշակիորեն մեղմում են էներգետիկ ճգնաժամը Արցախում

Հասարակություն 16:40 22/06/2023 Արցախ

Աննախադեպ տեղումները որոշակիորեն մեղմում են էներգետիկ ճգնաժամը Արցախում

«Հունիս ամսվա աննախադեպ տեղումները որոշակիորեն մեղմում են էներգետիկ ճգնաժամը, բայց պետք է արձանագրել, որ միայն այդպես չեն կարող վերականգնվել Սարսանգի ջրամբարի նախկին պաշարները»,-Artsakhtert-ի հետ զրույցում ասել է Արցախի Հանրապետության տարածքային կառավարման և ենթակառուցվածքների նախարարության մամուլի պատասխանատու Տաթևիկ Խաչատրյանը:

«Ջրամբարի պաշարների վերականգնումը հնարավոր կլինի միայն այն դեպքում, եթե Ադրբեջանը դադարի Հայաստանի Հանրապետությունից Արցախ Հանրապետություն մտնող էլեկտրասնուցման խոչընդոտումը: Այդ պարագայում ստիպված չենք լինի մեծ ծավալով օգտագործել ջրամբարի ռեսուրսները, և այն մոտավորապես մեկ տարվա ընթացքում կվերականգնի նախկին ծավալը: Բայց, ամեն դեպքում, գոյություն ունի տեղումների տարածաժամանակային բաշխման օրինաչափություն. այս տարի գարնանային տեղումները շատ քիչ էին, փոխարենը ամռան առաջին ամսում հորդառատ անձրևներ են, որոնք, ամենայն հավանականությամբ, կդադարեն հուլիսին»,-ասել է Տ. Խաչատրյանը:

Նրա խոսքով՝ ԱՀ կառավարությունն էլեկտրաէներգիայի սպառման ծավալների կրճատման հաշվին ջրամբարում որոշակի ջրային պաշարներ է փորձում կուտակել՝ առաջիկա ամիսներին և, հատկապես, ձմռանն ավելի արդյունավետ դիմակայելու խորացող էներգետիկ ճգնաժամին:

Նա նշել է, որ ՌԴ խաղաղապահ զորակազմի միջոցով սահմանափակ հումանիտար բեռների տեղափոխման հնարավորության պարագայում, կառավարությունը պիտի իրագործեր այլընտրանքային էներգիայի օգտագործման ծրագիր, սակայն ադրբեջանական հերթական սադրանքի հետևանքով կրկին անհնարին է դարձել անհրաժեշտ նյութերի և սարքավորումների ներկրումը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: