Ձեր վստահելի աղբյուրը

ՀԱԿ նախկին ակտիվիստ Տիգրան Առաքելյանը նոր տեսաուղերձ է հրապարակել՝ հայտարարելով, որ իրեն խոշտանգել են Քննչական կոմիտեում և ստիպել ցուցմունք տալ ԱԱԾ տնօրեն Արմեն Աբազյանի, գլխավոր դատախազի դեմ։

«Ինձ խոշտանգում էին և հարցնում էին՝ Աբազյան Արմենին  ճանաչում ես։ Ասում եմ՝ այո։ Hարցնում են՝ Աբազյան Արմենին ե՞րբ ես վերջին անգամ տեսել, ասում եմ, որ չեմ կարող հիշել, հեռուստացույցով եմ տեսել, անձամբ չեմ ճանաչում: Արա, քեզ էշի տեղ ես դրել, քեզ անձամբ էր տալիս ինֆորմացիա՞ն, թե՞ Անդոյի միջոցով: Անդո ասելով վստահաբար գիտեմ, որ ինքը նկատի ունի Անդրանիկ Սիմոնյանին: Նույնաբովանդակ ցուցմունք էր պահանջում ինձանից գլխավոր դատախազի վրա՝ հաշվի առնելով, որ գլխավոր դատախազի ամուսինը  2007-2008 թվականներից իմ ամենամոտ ընկերներից մեկն է»,- պատմում է նա։ 

Հիշեցնենք, որ  ավելի վաղ  Տիգրան Առաքելյանը տեսանյութեր էր տարածել՝ պատմելով  ՔԿ ղեկավար Արգիշտի Քյարամյանի ներկայությամբ իրենց խոշտանգելու մասին, ապա հայտնել, որ իրեն գործարք են առաջարկել։

Նշենք, որ հունիսի 20-ին Տիգրան Առաքելյանի եղբայրը՝ Հունան Սարգսյանը համացանցով օգնություն էր խնդրել։ Ըստ նրա՝ քննչականի աշխատակից ներկայացած դիմակավորված անձինք 3 օր առաջ մտել են իրենց առանձնատուն, խուզարկել ու տարել Տիգրանին։ Այս օրվանից նրանից լուր չունեն։

Հունիսի 20-ին Քննչական կոմիտեից «Ազատությանը» փոխանցել էին, որ Տիգրան Առաքելյանը մեղադրյալի կարգավիճակ ունի, քրեական գործ է հարուցվել միանգամից մի քանի հոդվածներով՝ շորթման և պաշտոնատար անձանց վերաբերյալ արատավորող տեղեկություններ հրապարակելուն օժանդակելու համար։ Այս հոդվածներով մինչև 6 տարվա ազատազրկում է նախատեսված։