Իջևանի «Դենդրոպարկ»-ի աշխատակիցներին կրճատում են, հիմնարկը փակվում է
Իջևանի «Դենդրոպարկ»-ի «գլխին» արդեն մի քանի տարի է «սև ամպեր» են կուտակվել։ Շրջակա միջավայրի նախարարությունն ամեն գնով ցանկանում է «ազատվել» տնօրեն Մեխակ Սայադյանից։
21․06․2023թ․-ին ՇՄՆ «Արգելոցապարկային համալիր» ՊՈԱԿ -ից Իջևանի «Դենդրոպարկ»-ի աշխատակիցներին տեղեկացրել են, որ հաստիքները կրճատվում են և շուտով Իջևանի «Դենդրոպարկ»-ի տնօրենը՝ Մեխակ Սայադյանը, պահակը, բանվորը և տեսուչն ազատվում են աշխատանքից։ Միաժամանակ նախարարությունից առաջարկել են «Ջերմուկի ջրաբանական» պետական արգելավայրում աշխատատեղեր։ Panorama.am-ի հետ զրույցում Իջևանի «Դենդրոպարկ»-ի տնօրեն Մեխակ Սայադյանը տարակուսանք հայտնեց՝ պնդելով, որ այս ամենն արվում է զուտ իրենից «ազատվելու» համար։
«Հիմա «Արգելոցապարկային համալիր» ՊՈԱԿ -ի տնօրենի պարտականությունները կատարում է Լևոն Տեր-Սիմոնյանը։ Մեր չորս հոգուն կանչեց՝ հանդիսավոր, ժպիտով, կարծես՝ ձեռք էր անռնում, և հայտարեց, որ մեր հաստիքները կրճատվում են՝ առանց հիմնավորումների։ Առաջարկում են «Ջերմուկի ջրաբանական»-ում հաստիքներ, չորսս էլ հրաժարվել ենք։ Ում կրճատում են, ասում են՝ գնա Ջերմուկ։ Այս մարդիկ տրամադրված են, որ մեզնից ազատվեն։ Բայց այստեղ հիմնական գույք, շենք-շինություններ կան, իսկ Իջևանի գինու գործարանին հատկացված տարածքում էլ 50 մլն դրամից ավելի տնկի կա։ Հիմնարկ են փակում մարդիկ։ Ասում եմ ՝ բա ո՞վ է տիրություն անելու այդ ամենը։ Այս մարդկանց ամբողջ նպատակն ինձնից ազատվելն է։ Ծանուցման մեջ նշված չեն հաստիքները կրճատելու պատճառն ու հիմնավորումը։ Սա հանցագործություն է։ Իհարկե դատի կտանք, նորից փաստաբան կվարձենք, այսպես չեմ թողնի, քանի որ հիմքեր չկան հաստիքները կրճատելու»,- ասաց Սայադյանը։
Իջևանի դենդրոպարկի տնօրենն արդեն մի քանի տարի է իրավական քաշքշուկների մեջ է։ Նախ 2021թ. օգոստոսի 16-ին ազատեց զբաղեցրած պաշտոնից, որից հետո Կոտայքի մարզի առաջին ատյանի դատարանը, բավարարելով հայցադիմումը,նա վերականգնվեց պաշտոնին։ 2022թ. սեպտեմբերի 23-ից Մ. Սայադյանը վերականգնվել է դենդրոպարկի տնօրենի պաշտոնում։ Հետո էլ շարունակում է պայքարը Իջևանի գինու, կոնյակի գործարանի գործունեության դեմ, որը շինարարություն է կատարել Աղստև գետի ափին և շուրջ 800 մետր երկարությամբ փոխել գետի հունը։ Ավելի քան 2,7 տարի դենդրոպարկը Աղստև գետից ինքնահոս եղանակով ոռոգման ջուր չի ստացել, ինչի արդյունքում չորացել և շարունակում են չորանալ հազվագյուտ և արժեքավոր ծառաթփատեսակներ։ Այս պահին վերացել է մոտ 250 տեսակի ծառ և թուփ, այսինքն՝ կոլեկցիան կրճատվել է 30֊40%֊ով։ Սայադյանը պահանջում է ստեղծել հանձնաժողով, գնահատել հասցված վնասը և փոխհատուցել։ Այս նպատակով, 2022թ․-ին հանցագործության մասին հաղորդում է ներկայացրել Գլխավոր դատախազություն։
«Քննիչներն աշխատում են։ Գործը դանդաղ է գնում, բայց,ըստ երևույթին, նյութեր են կուտակել։ Հիմա նոր նյութեր եմ պատրաստել, քանի որ այս չորացածները չեն ցանկանում գնահատել, վախենում են, ամենաքիչը 4 մլն դոլարի ծառեր են չորացել, թփերը՝ չհաշված»։
Բացի դրանից, Իջևանի «Դենդրոպարկ»-ի տարածքի մի մասը տրված է Իջևանի գինու, կոնյակի գործարանին, ինչը, Սայադյանի համոզմամբ, անօրինական է։
«Քրեական վարույթում գտնվող օբյեկտը տրամադրել են վարձակալության այն սուբյեկտին, որը մեղավոր է այդ օբյեկտի քայքայման համար։ Խոսքը ՝ գետի ափերի լվածման և ծառերի չորացման մասին է։ Եվ այն նախարարությունը, որը պետք է պաշտպաներ և պահպաներ բնությունը , «չոքել» է գործարանի առջև կամ էլ ՝ ունեն պայմանավորվածություններ։ Ակնհայտ երևում է, որ ՇՄՆ-ն վախենում է Իջևանի գինու,կոնյակի գործարանի տերերից։ Ուզում են, որ անպայման իմ միջոցով գնան գինու գործարանի դեմ առճակատման։ Քննչական կոմիտեն իրենց գրությամբ դիմել է , որ ծառերը գնահատելու համար հանձնաժողով կազմեն, մինչև հիմա չեն արել»,- ասաց Սայադյանը։
Նրա խոսքով՝ դեռ այս գործը չփակված, հիմա էլ նորից պետք է սկսեն պայքարել պաշտոնի վերականգնման համար։
«Թողե՛ք հանգիստ, ո՛չ ես , ո՛չ էլ տղաս չենք ցանկանում առճակատման գնալ, ինչի՞ եք այնպայման բզբզում․․․»։
Ավելացնենք, որ Իջևանի «Դենդրոպարկ»-ը հիմնադրվել է 1962 թվականին՝ Լյուդվիգ Սայադյանի կողմից։ Ներկայիս տնօրեն Մեխակ Սայադյանը նրա որդին է։ Դենդրոպարկը , որտեղ հաշվարկված է 650 ծառ ու թուփ, ներառված է Շրջակա միջավայրի նախարարության «Արգելոցապարկային համալիր» ՊՈԱԿ-ի կազմում։
Լրահոս
Տեսանյութեր
Կլինի այնպիսի մի շաբաթ, երբ որ այդ լուրը գուցեև ճիշտ լինի. Ավանեսյանը՝ ՔՊ-ի թիրախում լինելու մասին
