Ձեր վստահելի աղբյուրը

Երևանի մի շարք թաղապետարաններ հրաժարել են տարածք տրամադրել «Հայաքվե» նախաձեռնությանը ստորագրահավաքի համար։ Ասուլիսում հայտարարեց «Հայաքվե» նախաձեռնության  լիազոր ներկայացուցիչ Արամ Պետրոսյանը։

«Հունիսի 20-ին Կենտրոնական ընտրական հանձնաժողովը գրանցել է մեր նախաձեռնությունը և նրա լիազոր անձին, որից անմիջապես հետո, նույն օրը, Երևանի բոլոր վարչական  շրջաններին իմ ստորագրությամբ դիմում է ներկայացվել, որպեզի տարածք տրամադրեն։ Դա «Հանրաքվեի» մասին օրենքով  է կարգավորվում։ Սակայն, մեզ համար զարմանալիորեն, որոշ վարչական շրջաններից մերժման պատասխաններ ստացանք, մեծ մասը դեռ չի էլ պատասխանել։

Որոշ վարչական շրջանների ղեկավարներ պատասխանել են, որ իրենք ազատ տարածքներ չունեն, իսկ որոշներն էլ պատասխանել են, որ Երևանի քաղաքապետարանի իրավաբանական վարչությունից ստացել են գրավոր ցուցում, այն է, որ 2022 թվականի ավագանու ինչ-որ որոշման հիման վրա, իրենք չեն կարող տարածք տրամադրել։ Մեր նախաձեռնությանը մերժել են Ավան, Նոր Նորք, Կենտրոն, Նուբարաշեն, Աջափնյակ  վարչական շրջանները», - նշեց նա։

Ա.Պետրոսյանն ասաց, որ Սպիտակ և Դիլիջան համայնքներից նմանատիպ նամակներ են ստացել, այս պահի դրությամբ ունեն դրական պատասխաններ Մասիս, Արարատ, Իջևան, Աշոցք, Ալավերդի, Արմավիր, Մեղրի, Չարենցավան համայնքներից։ Շուրջ 50 համայնքի են դիմել, 15 համայքնից են պատասխան ստացել։ 

Նա հայտնեց, որ այսօր առավոտյան դատախազին հաղորդում է ներկայացվել հանցագործության մասին՝ հղում անելով Քրեական օրենսգրքի 441-րդ հոդվածին՝ Պաշտոնատար անձի կողմից իր իշխանական կամ ծառայողական լիազորությունները կամ դրանցով պայմանավորված ազդեցությունն ի վնաս պետական կամ ծառայողական շահերի օգտագործելը կամ իր ծառայողական պարտականությունը չկատարելը կամ ոչ պատշաճ կատարելը կամ այնպիսի արարք կատարելը, որը չի բխում իր լիազորություններից կամ դուրս է իր լիազորությունների շրջանակից, որն էական վնաս է պատճառել անձի կամ կազմակերպության իրավունքներին, ազատություններին կամ օրինական շահերին կամ հասարակության կամ պետության օրինական շահերին։

«Առավոտյան նաև դիմել ենք ԿԸՀ՝  նկարագրել ենք խնդր առարկան, այսօր բանավոր ասել են որ անպայման ևս մեկ անգամ միջոց կձեռնարկեն խնդիրը լուծելու համար։

Պատրաստվում ենք դիմել նաև Հանրապետության նախագահին, ՄԻՊ-ին, մի շարք եվրոպական կառույցների»,- ասաց Ա. Պետրոսյանը։

Հարցին՝ արդյո՞ք նախատեսվում է վերանայել ստորագրությունների ժամկետները, քանի որ ժամանակացույցն ընթացքի մեջ է, բայց ստորագրահավաք չի իրականացվում, «Հայաքվե» նախաձեռնության համակարգող Ավետիք Չալաբյանն ասաց. «Բարդ հարց է, նախադեպ չունենք ուղիղ ժողովրդավարության ճանապարհով հանրաքվե նախաձեռնել։ ԿԸՀ ինքը հայտնվել է բարդ իրավիճակում։ Մեզ հատկացված է 60 օր 50 հազար ստորագրություն հավաքելու համար։ Ակնհայտ է, որ դա հնարավոր է, երբ որ  որևէ նման խոչընդոտ չի ստեղծվում։ Ապօրինության դեմ արդեն պայքարում ենք։

Հնարավոր մի քանի լուծում ենք տեսնում, առաջարկել են դրանք նաև ԿԸՀ-ին։ Առաջին՝ վերականգնել կորցրած ժամկետը, դիտարկել հնարավորություն ստորագրահավաքի  ժամկետը երկարացնել ուղիղ այն չափով, որչափով առաջացել են խոչընդոտաները։

Երկրորդ տարբերակ.  եթե մենք տեսնենք, որ խոչընդոտների վերացումն ավելի երկար է տևում, իսկ խոչընդոտների վերացումը պարտադիր պայման է, որպեսզի մեր քաղաքացիներն   անկախ նրանից, թե հանրապետության որ համայնքում են ապրում,  բացարձակ  անարգելք իրավունք ստանան իրենց սահմանադրական իրավունքներն իրացնելու համար, ապա մենք կվերգործարկենք նախաձեռնությունը։ Այսինքն՝ հիմա կկանգնեցնենք նախաձեռնությունը,  երբ որ օրենքով նախատեսված ամբողջ ծավալով իրավունքները կապահովեն, մենք  վերագործարկում կանենք դրանից հետո։ Մենք չենք մտնի այն թակարդի մեջ, որ լարել են այս իշխանությունները»։

Նա ընդգծեց, որ ստոագրահավաքն իմաստ ունի իրականացնել միայն այն դեպքում, երբ ՀՀ բոլոր քաղաքացիներն իրավունք ունեն մասնակցել դրան։

«Իշխանությունները թույլ են տալու ու պայման են ստեղծելու, որպեսզի մեր բոլոր քաղաքացիները օրենքով նախատեսված և սահմանադրությամբ նախատեսված հավասար իրավունք ստանան։ Երբ որ այդ հավասար անարգել իրավունքը  կապահովեն, այդ ժամանակ էլ ստորագրահավաքը կշարունակենք»,- ասաց Ա. Չալաբյանը։

Այս պահին ստորագրահավաքը շարունակվում է միայն էլեկտրոնային տարբերակով։ 

«Ստորագրահավաք չենք իրականացնի, մինչև ստորագրահավաքի համար բոլոր ապօրինի, հակասահմանադրական խոչընդոտները, որոնք հարուցել է գործող վարչակարգն իր դրածոների միջոցով, չվերացվեն ամբողջ ծավալով, այլապես դա կլինի մեր քաղաքացիների իրավունքների խախտում. մեր բոլոր քաղաքացիներն, անկախ նրանից, որտեղ են բնակվում, պետք է հավասար իրավունք ու հնարավորություն ստանան իրենց սահմանադրական իրավունքն իրացելու համար»,- ասաց Ա. Չալաբյանը։