Ձեր վստահելի աղբյուրը

«Դուք բոլորդ տեսաք, հասկացաք, թե ինչ պայմաններում են ընթանում ԱԺ նիստերը, սա ուղղակի խայտառակություն է», ԱԺ-ում լրագրողների հետ զրույցում ասաց ընդդիմադիր պատգամավոր Թագուհի Թովմասյանը՝ խոսելով այսօր ԱԺ նիստի ընթացքում տեղի ունեցած միջադեպի մասին։ 

«Ամեն անգամ ինչ-որ առիթ փնտրել և նիստերը վերածել փողոցային, խուլիգանական գործընթացի...  Ես այլևս շատ անհարմար եմ զգում այս դահլիճ մտնել, որովհետև  ամեն անգամ մտնում ես և չգիտես, թե այս դահլիճում քեզ ինչ է սպասվում։ Ես ամաչում եմ ամեն անգամ, որ ուղիղ եթերում մարդիկ ստիպված են լսել փողոցային բառապաշարի կիրառում պատգամավորների կողմից։ Դուք ուղղակի չեք լսել, թե ինչ էր տեղի ունենում այն ժամանակ, երբ ընդմիջում էր հայտարարված։ Իշխանական պատգամավորները անթաքույց վիրավորանքներ ու սպառնալիքներ էին հնչեցնում ընդդիմադիրների հասցեին»,- ասաց նա։ 

Թ. Թովմասյանը նշեց, որ «Պատիվ ունեմ» խմբակցությունն այսօրվա նիստին չի մասնակցի. «Սա ի նշան բողոքի, որ մենք չենք կարող հանդուրժել այսպիսի իրավիճակը։ Ուզում եմ նկատել, որ այս լարվածությունը ԱԺ նախագահից սկսվեց։ Ինքը սկսեց վիրավորել ընդդիմադիր խմբակցության  ղեկավար Սեյրան Օհանյանին, հետո, ի նշան բողոքի, դուրս եկավ դահլիճից, ինչից հետո ՔՊ-ականները սկսեցին իրենց փողոցային լեքսիկոնը գործի դնել։

Իսկապես, մենք լուրջ մտածելու խնդիր ունենք, ում հետ գործ ունենք։ Անկեղծ չեմ պատկերացնում այսօրվա մեր աշխատանքներն այլևս»,-ասաց Թ. Թովմասյանը։ 

Նա նշեց, որ այսօր հաստատ չեն մտնելու նիստերի դահլիճ, մյուս օրերի մասով որոշում կկայացնեն։

Լրագրողի դիտարկմանը, թե իշխանության ներկայացուցիչները վրդովված են, որ ընդդիմությունը չի մասնակցել Վիգեն Խաչատրյանի հոգեհանգստին, Թ. Թովմասյանը ասաց. «Ես սովորաբար  գնում եմ մարդկանց հոգեհանգստի արարողություններին կամ թաղումներին, որոնց ճանաչում եմ կամ մտերիմ եմ կամ ընտանիքի անդամերի հետ ունեմ մտերիմ հարաբերություններ։ Ես երբեք Վիգեն Խաչատրյանի հետ չեմ ունեցել մտերիմ հարաբերություններ։ Դա իմ անձնական որոշումն է՝ մասնակցե՞լ, թե՞ ոչ։

Ասեմ, ի դեպ, կան ՔՊ-ականներ, Աստված մի արասցե, եթե մի բան պատահի իրենց հետ,  կգնամ երկու առիթին էլ՝ և հուղարկավորությանը, և հոգեհանգստին։ Բայց սա չի կարելի դարձնել քաղաքական թիվ մեկ առարկա»։

Խոսելով Արցախում տիրող իրավիճակի մասին՝ նա ասաց. «Մենք ունենք լրջագույն խնդիրներ և Հայաստանի սահմանին, որտեղ ամենօրյա  ռեժիմով կրակոցներ են, ունենք խնդիր միջազգային  հանրության հետ աշխատանքում, անընդհատ տեղեկացնենք, թե ինչ է  կատարվում մեր երկրի շուրջ, ՀՀ սուվերեն տարածքը վտանգված է։

Ի տարբերություն աշխարհի մյուս երկրների, ՌԴ այն երկիրն է,  որը երաշխավորել է  նոյեմբերի 9-ի հայտարարության ստորագրումը, ՌԴ ղեկավարը ստորագրել է հայտարարության տակ, որի   մեջ գրված է, որ Լաչինի միջանցքը պետք է գործի անխափան, երկկողմանի, դրա  երաշխավորը ՌԴ-ն է, այսինքն միայն կոչ  անելը այս դեպքում խիստ անբավարար է, պետք է կոնկրետ գործիքակազմերի կիրառում, կոնկրետ խաղաղապահները պետք է ուժով բացեն այդ ճանապարհը, դա պետք է անեին  առաջին օրվանից, ոչ թե թողեին, որ հիմա էլ ինչ-որ սարքեր են դրել»։