Ձեր վստահելի աղբյուրը

«Իշխանության յուրացումը որևէ կազմակերպության կամ անհատի կողմից հանցագործություն է։ «Հայաքվե»-ի գործընթացը նախաձեռնվել է՝ հիմք ընդունելով ՀՀ Սահմանադրության երկրորդ հոդվածով երաշխավորված հիմնարար իրավունքը»,-լրագրողների հետ ընթացող հանդիպմանն ասաց «Հայաքվե» նախաձեռնության համակարգող Ավետիք Չալաբյանը։
 

Նա հիշեցրեց ՀՀ Սահմանադրության 2-րդ հոդվածն ամրագրում է. «ՀՀ-ում իշխանությունը պատկանում է ժողովրդին, Ժողովուրդն իր իշխանությունն իրականացնում է ազատ ընտրությունների, հանրաքվեների, ինչպես նաև Սահմանադրությամբ նախատեսված պետական և տեղական ինքնակառավարման մարմինների ու պաշտոնատար անձանց միջոցով»։

Չալբյանն ընդգծեց նաև ՀՀ Սահմանադրության 109 և 204 հոդվածները, որոնցով սահմանվում են քաղաքացիական նախաձեռնության կարգով  օրենսդրական նախաձեռնության  և այնուհետև հանրաքվեի իրավունքները։

«Հենց այս հիմքով, ինչպես նաև հիմնվելով «Հանրաքվեի մասին» սահմանադրական օրենքի վրա՝ հունիսի 20-ին ՀՀ ԿԸՀ-ն գրանցել է «Հայաքվեի» նախաձեռնությւոնը՝ տալով նրան իրավական առումով պարտադիր բնույթ։ Սակայն գորոծող վարչակազմը հերթական անգամ որոշել է ի ցույց դնել իր  անօրեն բնույթը՝ փորձելով խաթարել ժողովրդի հիմնարար իրավունքը՝ հանրաքվեի միջոցով իրացնելու իր իշխանությունը։ Մասնավորապես, Երևանի մի շարք վարչական շրջանների թաղապետարաններ, հղում կատարելով Երևանի քաղաքապետի ապօրինի պաշտոնակատար՝ ոմն Լևոն Հովհաննիսյանի վրա, իրենց պաշտոնական նամակներով անցած շաբաթվա ընթացքում հրաշարվել են տարածքներ տրամադրել ստորագրահավքի համար, թեև դա «Հանրաքվեի մասին» օրենքի իմպերատիվ պահանջ է և նրանց սահմանադրական պարականություն է»,-հայտարարության մեջ ասաց Չալաբյանը։

Նա ընդգծեց՝ փաստորեն մի կողմից բռնապետ  Ալիևը բռնանում է արցախցիների հիմնարար իրավունքների վրա, մյուս կողմից նրա գործընկեր Փաշինյանը՝ իր դրածոների միջոցով Երևանի բնակիչների օրինական, հիմնարար իրավունքների վրա։

«Ուստի մենք գործ ունենք հայ ժողովրդի թե արտաքին, թե ներքին թշնամական գործողությունների հետ։ Սա առաջին նման դրսևորումը չէ, բայց այս անգամ մենք համոզված են, որ ժողովուրդը պատրաստ  է պայքարել դրա դեմ իր սեփական քվեով»,-ասաց նա։

Նախաձեռնության համակարգողի խոսքով, գործող վարչակազմը, գիտակցելով դա, փորձում է մեզ՝ հայերիս զրկել սեփական որոշումը օրենքի տեսքով ամրագրելուց։

«Բոլոր պաշտոնյաների դեմ, որոնք բռնանում են մեր ժողովրդի անքակտելի իրավունքների դեմ, մեր նախաձեռնող խումբը գլխավոր դտախազին արդեն ներկայացրել է հաղորդում հանցագործության մասին։ Ընդ որում, ակնհայտ է, որ դա իրականացվում է  կազմակերպված խմբի միջոցով, որն ապօրինի կերպով զավթել է իշխանությունը Երևանի քաղաքապետարանում և որևէ կերպ այսօր չի ներկայացնում Երևանի բնակչությունը»,-ասաց Չալաբյանը։

Նրա խոսքով, այդպիսով իշխանություններն ի ցույց դրեցին իրենց իսկ վախերը, հասկանալով, որ 50 հազար ստորագրությունը կարող է վերածվել համազգային պայքարի մեկնարկի՝ հանուն Հայաստանի ու Արցախի։

«Մենք մինչև վերջ փորձելու ենք այս վարչակարգի դեմ պայքարել օրինական ճանապարհով, սակայն մեր համբերությունը անսահման չէ։
Մենք ի վերջո կգտնենք միջոցներ՝ վերջ դնելու Երևանի քաղաքապետարանին տիրացած ապօրինի խմբակի և նրա քաղաքական շահառուների կամայականություններին, և վերականգնելու սահմանադրական կարգը և ժողովրդի լիարժեք իշխանությունը մեր երկրում։  Իշխանությունը պատկանում է ժողովրդին, ոչ թե ժողովուրդն է պատկանում իշխանությանը»,-ասաց նա։

Նշենք, որ ՀՀ Սահմանդրության 109 հոդվածը սահմանում է.
«1. Օրենսդրական նախաձեռնության իրավունք ունեն պատգամավորը, Ազգային ժողովի խմբակցությունը և Կառավարությունը:
2. Օրենսդրական նախաձեռնության հեղինակը կարող է ցանկացած ժամանակ հետ կանչել իր ներկայացրած օրենքի նախագիծը:
3. Եթե Կառավարության եզրակացության համաձայն` օրենքի նախագիծն էականորեն նվազեցնում է պետական բյուջեի եկամուտները կամ ավելացնում պետության ծախսերը, ապա Կառավարության պահանջով այդ օրենքը կարող է ընդունվել պատգամավորների ընդհանուր թվի ձայների մեծամասնությամբ:
4. Կառավարության որոշմամբ անհետաձգելի համարվող օրենքի նախագիծն ընդունվում կամ մերժվում է երկամսյա ժամկետում:
5. Այն օրենքների նախագծերը, որոնց օրենսդրական նախաձեռնության բացառիկ իրավունքը պատկանում է Կառավարությանը, քվեարկության կարող են դրվել միայն Կառավարության համար ընդունելի ուղղումներով:
6. Ընտրական իրավունք ունեցող առնվազն հիսուն հազար քաղաքացի ունի Ազգային ժողովին քաղաքացիական նախաձեռնության կարգով օրենքի նախագիծ առաջարկելու իրավունք»։

Հոդված 204. Քաղաքացիական նախաձեռնության կարգով ներկայացված օրենքի նախագծի վերաբերյալ հանրաքվեն

1. Եթե Ազգային ժողովը մերժում է Սահմանադրության 109-րդ հոդվածի 6-րդ մասով սահմանված կարգով ներկայացված օրենքի նախագծի ընդունումը, ապա մերժումից հետո` վաթսուն օրվա ընթացքում, օրենքի նախագծի ընդունման նախաձեռնությանը ընտրական իրավունք ունեցող ևս երեք հարյուր հազար քաղաքացու միանալու դեպքում նախագիծը դրվում է հանրաքվեի, եթե Սահմանադրական դատարանը նախագիծը ճանաչում է Սահմանադրությանը համապատասխանող: Քաղաքացիական նախաձեռնության մասնակիցների ստորագրությունների վավերականությունը հաստատում է Կենտրոնական ընտրական հանձնաժողովը:
2. Հանրաքվեի միջոցով ընդունված օրենքները կարող են փոփոխվել միայն հանրաքվեով: Նման փոփոխություն կարող է կատարվել համապատասխան օրենքի ընդունումից առնվազն մեկ տարի հետո:
3. Հանրաքվեի չեն կարող դրվել այն օրենքների նախագծերը, որոնք վերաբերում են սահմանադրական օրենքների իրավակարգավորման առարկային, պետական բյուջեին, հարկերին, տուրքերին, այլ պարտադիր վճարներին, համաներմանը, պետության պաշտպանությանը և անվտանգությանը, միջազգային պայմանագրերին, ինչպես նաև Հանրաքվեի մասին օրենքով սահմանված այլ հարցերի: