Ձեր վստահելի աղբյուրը

ՀՀ վիճակագրական կոմիտեի հրապարակած տվյալների համաձայն՝ 2023 թվականի հունվար-մայիսին նախորդ տարվա նույն ժամանակահատվածի նկատմամբ տնտեսական ակտիվության ցուցանիշն աճել է 12․5%-ով։ Մայիս ամսվա ՏԱՑ-ը ապրլի նկատմամբ կազմել է 7․7%, իսկ նախորդ տարվա նույն ամսվա՝ մայիսի համեմատ՝ 13․7%:

Ըստ վիճակագրական կոմիտեի՝ արդյունաբերական արտադրանքի ծավալն այս տարվա հինգ ամիսներին աճել է 3%-ով, իսկ 2022թ-ի մայիսի համեմատ՝ 5․3%-ով:

Շինարարության ոլորտում այս տարվա հունվար-մայիսին արձանագրվել է 16․7%-ի աճ, իսկ էլեկտրաէներգիայի արտադրության ոլորտում գրանցվել է 3․1%-ի անկում։

Ըստ վիճակագրական կոմիտեի` առևտրաշրջանառության ծավալները հինգ ամիսներին նախորդ տարվա նույն ժամանակահատվածի համեմատ աճել են 24․5%-ով, ծառայությունների ծավալը (առանց առևտրի)՝  19․9%-ով:

Ինչ վերաբերում է սպառողական գներին, ապա հունվար-մայիսին գները նախորդ տարվա նույն ժամանակահատվածի համեմատ աճել են 5․2%-ով, իսկ 2022 թ-ի մայիսի համեմատ՝ 1․3%-ով։
Արտաքին առևտրաշրջանառության ոլորտում էլ այս տարվա հինգ ամիսներին նախորդ տարվա նույն ժամանակահատվածի համեմատ արձանագրվել է 86․9%-ի աճ, ընդ որում` արտահանումն ավելացել է 93.3%-ով,  ներմուծումը՝ 83․3%-ով:

Նշենք, որ Վիճակագրական կոմիտեն հանրապետական միջին ամսական անվանական աշխատավարձի վերաբերյալ տվյալներ չի հրապարակել, մինչդեռ ամեն ամիս մակրոտնտեսական ցուցանիշներում այդ տվյալները ներառվում էին։