Ձեր վստահելի աղբյուրը

Աշխարհում թմրանյութ օգտագործողների թիվը 10 տարում աճել է 23 տոկոսով՝ 2011 թվականին 240 միլիոնից 2021 թ-ին հասնելով 296 միլիոնի։

Միևնույն ժամանակ, ինչպես գրում է «dw.com»-ը,  թմրամիջոցների օգտագործման հետ կապված խանգարումներից տառապող մարդկանց թիվը նույն ժամանակահատվածում աճել է 45 տոկոսով՝  հասնելով  39,5 միլիոնի: Նման տվյալներ ներկայացված է ՄԱԿ-ի թմրամիջոցների և հանցավորության հարցերով վարչության զեկույցում, որը հրապարակվել է այսօր՝ հունիսի 26-ին:

Ըստ փորձագետների՝ թմրամոլների թվի աճը միայն մասամբ է բացատրվում աշխարհի բնակչության ընդհանուր աճով։

Մյուս կարևորագույն գործոնը նրանք համարում են սինթետիկ թմրանյութերի աճը, որոնք իրենց «էժան, հեշտ և արագ արտադրության» շնորհիվ արմատապես փոխել են բազմաթիվ անօրինական շուկաներ:

Զեկույցում նշվում է, որ երիտասարդությունը շարունակում է մնալ ամենախոցելի խումբը։ Աֆրիկայում թմրամիջոցների բուժման մեջ գտնվող մարդկանց 70 տոկոսը 35 տարեկանից ցածր է: Ընդ որում, ամբողջ աշխարհում նման բուժում է ստանում այն մարդկանց միայն 20 տոկոսը, որոնք դրա կարիքն ունեն։