Ձեր վստահելի աղբյուրը

«Երբ որ պատերազմը սկսվել է, կինս ինձ ասել է, որ երբ որ այնտեղ պատերազմ է, ես չեմ կարող Երևանում պարապ մնալ, գնամ այնտեղ, գոնե մարդիկ կլինեն օգնության  ցույց տալու խնդիր կլինի և այլն»,- 2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով ստեղծված ԱԺ քննիչ հանձնաժողովի նիստում ասաց Նիկոլ Փաշինյանը՝ անդրադառնալով կնոջ՝ Աննա Հակոբյանի պատերազմի օրերին բունկերում գտնվելուն։

Փաշինյանը նշեց, որ, բնականաբար, այնտեղ տեղյակ են եղել կնոջ այցի մասին։

«Այդ օրերին ահագին մարդիկ, կանայք, ընտանիքներ լքել էին Ստեփանակերտը։ Իմ կնոջ այնտեղ գտնվելու սիմվոլիկ իմաստն այն էր, որ նաև մենք մեր ներկայությունն այնտեղ ապահովենք։ Եվ այնտեղ կային մարդիկ, որ չէին կարողացել դուրս գալ, նկուղներում էին, սննդի կարիք կար, և կնոջս այնտեղ մեկնելու նպատակը եղել է դա։

Եվ հընթացս, բնականաբար, նաև Լեռնային Ղարաբաղի ղեկավարության հետ շփում է եղել։ Գաղափար է հնչել, որ գուցե իմաստ ունի, որ 10 րոպեով գնան, որ նաև  հրամկազմը տեսնի, որ Հայաստանի վարչապետի կինը գտնվում է Ստեփանակերտում։

Եղել են մարդիկ, որ մտածել են՝ դրական ներգործություն կունենա հատկապես այդ ծանր մթնոլորտում, որ վարչապետի ընտանիքի անդամն  այնտեղ է գտնվում։ Եվ առաջարկ է եղել քաղաքավարական այց անել հրամկազմին, այդ քաղաքավարական այցը եղել է, գնացել է, ողջունել է, 10- 15 րոպե մնացել է այնտեղ, դուրս է եկել»,- պատմեց Փաշինյանը։

Հարց էր հնչել՝ պատերազմական գործողությունների ընթացքում պաշտպանության բանակի հրամանատարական շտաբում, ըստ սոցցանցերում հայտնված նկարների, եղել են մարդիկ, ովքեր իրավունք չունեին գտնվել այնտեղ, մասնավորապես Դավիթ Գալստյանը՝ «Պատրոն Դավոն», ինչպե՞ս կմեկնաբանի գաղտնիության որևէ թույլտվություն և պաշտոն չունեցող մարդու՝ հրամանատարական կետում գտնվելը, նաև շատ է խոսվել պատերազմական գործողությունների ընթացքում Փաշինյանի կոնջ՝ Աննա Հակոբյանի Արցախում  գտնվելու փաստի մասին, ով շփումներ է ունեցել նաև ռազմական ղեկավարության տարբեր պաշտոնյաների հետ։ 

Նիկոլ Փաշինյանը նաև ասաց.  «Ամենևին փաստ չէ, որ այն մարդը, ով հրապարակել է այդ տեղեկությունըտ, խոսքը Մովսես Հակոբյանի մասին է, ինքն այդ բունկերում գտնվելու իրավունք ուներ։ Ինքն այդ ժամանակ եղել է ռազմական վերահսկողության վարչության պետը։ Ինքը ռազմական դրության պայմաններում իր աշխատավայրում չի գտնվել։ 

Հոկտեմբերի 2-ին կամ 3-ին եկավ տեղեկատվություն, որ որոշում է կայացվել, որ ԼՂ Պաշտպանության բանակի 7-րդ պաշտպանական շրջանը պետք է էվակուացնել, այսինքն զորքերը ամբողջությամբ դուրս բերել: Ես միանգամից կապ հաստատեցի ԼՂ իմ գործընկերների հետ և ասացի՝ որքանո՞վ է ճիշտ, որ նման որոշում կա: Ինձ ասացին, որ իսկապես նման որոշում կա:
ԼՂ նախագահի հետ խոսեցի, հետո նաև ՊԲ հրամանատարի հետ: Քննարկումների արդյունքում ինձ ասվեց, որ շատ լուրջ վերլուծության արդյունքում կայացված որոշում է: Ասացի՝ ո՞վ է արել այդ վերլուծությունը և ով է կայացրել որոշումը։ Ինձ պաշտպանության բանակի հրամանատարի կողմից ասվեց, որ Մովսես Գրանտիչն է այդ ռեկոմենդացիան տվել: Ես ասացի՝ մի րոպե, նախ, Մոսվես Գրանտիչն  ի՞նչ գործ ունի այդտեղ, դա իր աշխատավայրը չէ:

Ես Արցախի նախագահի հետ խորհրդակցելով, և ի պատիվ նրա, ինքը որոշում կայացրեց և մի խմբով գնաց իրադրությունը տեղում գնահատելու:

Այնտեղ գնահատականն այն էր, որ եթե մեր զորքը չհեռանա, ամբողջությամբ հայտնվելու է շրջափակման մեջ, Մովսես Գրանտիչը ասում է՝ րոպե  առաջ պետք է 7-րդ պաշտպանական շրջանը էվակուացնել:

Ի պատիվ ԼՂ նախագահի, նա գնաց, տեղում գնահատեց իրավիճակը և այդ տարածքն այսօր  Լեռնային Ղարաբաղի վերահսկողության ներքո է»։