Ձեր վստահելի աղբյուրը

«Այսօր մենք մոտ 105 ծրագիր ունենք, որից 20-ը վերաբերում է մոտ 45 կմ ճանապարհների սպասարկմանը և վերանորոգմանը»,-Երևանի ավագանու նիստում հայտարարեց Շինարարության և բարեկարգման վարչության պետի պաշտոնակատար Խորեն Գրիգորյանը:

Վերջինս հայտնեց, որ կա նաև 9 ստորգետնյա անցումում 18 վերելակի տեղադրման ծրագիր, 5 տեղամասերում թեքահարթակների կառուցում:

Վարչության պետի պաշտոնակատարի խոսքով՝ կա նաև Արգավանդի երկաթուղային կամրջի սյուների ամրացման ծրագիրը:

«Նախագծման փուլում է 8 ծրագիր Ազատության հրապարակի բարեկարգման համար, Սարալանջ փողոցի հարակից հատվածի քարաթափման կանխարգելման ծրագիրը, Մաշտոց- Պարոնյան-Գրիգոր Լուսավորիչ հանգույցի տրանսպորտային թունելի հիմնանորոգման, ավտոկայանատեղիի կառուցման ծրագրերն էլ կան»,-հայտնեց Խորեն Գրիգորյանը և տեղեկացրեց, որ Կիևյան փողոցի ամբողջական մայթերի հիմնանորագման ծրագիր էլ է իրականացվելու և Եղվարդի խճուղու վերգետնյա անցում է կառուցվելու:

Ըստ քաղաքապետարանի պաշտոնյայի՝ Հրազդանի հաղթանակ կամրջի ուժեղացման և Կիևյան կամրջի հիմնանորագման ծրագեր են կատարվելու, ինչպես նաև Նորք Մարաշը Մյասնիկյան պողոտային կապող էստակադայի կառուցումը և 25 այգու բարեկարգումը:

Նա նաև հայտնեց, որ դրանից բացի կա նաև 10 նախագիծ, որոնք դեռևս շինարարական մրցույթում չեն:

Ավագանու անդամներից մեկը Խորեն Գրիգորյանին հարցրեց, թե ինչ վիճակում է Հաղթանակ կամրջի վերանորգման աշխատանքները, քանի որ քաղաքացիները բազմաթիվ թերությունների մասին են հաղորդում:

Գրիգորյանը հայտարարեց, որ շինարարական աշխատանքները դեռ ավարտված չեն և վստահեցրեց, որ անորակ աշխատանքը քաղաքապետարանը չի ընդունի և վստահեցրեց, որ կամրջով քաղաքացիները կարող են անցնել, իրենց գլխին վերևից ընկնող իր չի լինի: