Ձեր վստահելի աղբյուրը

«Միջազգային հանրությանը մեր կոչը մեկն է՝ գործուն քայլեր ձեռնարկել, կոչերից,  հայտարարություններից, ուղղակի հորդորներից զատ այնպիսի քայլեր իրականացնել, որպեսզի  Ադրբեջանը դադարեցնի էթնիկ զտումների քաղաքականությունը Արցախում»,- ՀՅԴ-ի նախաձեռնած «SOS Artsakh» կարգախոսով 24-ժամյա նստացույցերի շրջանակում ՌԴ դեսպանության մոտ լրագրողների հետ զրույցում ասաց ԱԺ «Հայաստան» խմբակցության պատգամավոր Աննա Գրիգորյանը։

Նա ընդգծեց, որ կոչերից, հայտարարություններից զատ պետք է  լինեն պատժամիջոցներ, բայց, ցավոք, ականատես են, որ ոչ թե պատժամիջոցներ են կիրառվում Ադրբեջանի նկատմամբ, այլ ավելի խորացվում է  համագործակցությունը ու դա վերաբերում է  միջազգային հանրության գերթե բոլոր դերակատարներին։

«Մեր կոչն է հայտարարություններից բացի անցնել գործնական քայլերի։ Որևէ մեկի մոտ արդեն կասկած չկա, որ Ադրբեջանը էթնիկ զտումների քաղաքականություն է  իրականացում, մեր կոչը այն է՝ ոչ միայն արձագանքել, որ այդպիսի քաղաքականություն է  իրականացվում Արցախում, այլ նաև քայլեր ձեռնարկել նախ կանխելու, ապա պատժելու այն կողմին, որը փորձում է նման քայլեր իրագործել»,- ասաց Ա. Գրիգորյանը։

Նա նշեց, որ ՌԴ-ն ներկայացվածություն ունենալով Արցախում, լինելով նոյեմբերի 9-ի եռակողմ հայտարարության ստորագրող կողմերից մեկը՝ ավելի հստակ գործուն  քայլեր պետք է իրագործի Լաչինի միջանցքը ապաշրջափակելու համար։

«Ի վերջո հասկանալի  է, որ հենց Ռուսաստանն ունի ամենամեծ գործիքակազմը  տարածաշրջանում՝ քաղաքական, դիվանագիտական,  ռազմական, նոյեմբերի 9-ի հայտարարության միջնորդ կողմ է, նախ և առաջ Ռուսաստանը հստակ քայլեր պետք է ձեռնարկի ապաշարջափակում իրականացնելու համար»,- ասաց Աննա Գրիգորյանը։