Ձեր վստահելի աղբյուրը

«Ադրբեջանը շարունակում է կոպտորեն խախտել 2020 թվականի նոյեմբերի 9-ի հայտարարության  դրույթները՝ կիրառելով ականանետեր, ԱԹՍ-ներ, գիշերը Մարտունու և Մարտակերտի դիրքերի ուղղությամբ իրականացրել է ահաբեկչական գործողություններ, որի հետևանքով ունեցել ենք անդառնալի մարդկային կորուստներ»,-Արցախի Հանրապետության Ազգային ժողովի նիստում հայտարարեց  «Ազատ հայրենիք-ՔՄԴ» խմբակցության անդամ Արթուր Հարությունյանը։

Նա նշեց, որ լիակատար շրջափակումը,  ուժի սպառնալիքի  միջոցով Արցախն առանց հայերի թողնելու Բաքվի իշխանությունների  հետևողական քաղաքականությունը և ժամանակ առ ժամանակ ուժի կիրառումն ապացուցում են Ադրբեջանի կողմից  Արցախում էթնիկ զտումներ իրականացնելու վերջնանպատակի գոյությունը։

«Ամերիկյան միջնորդությամբ  բանակցային գործընթացին և խաղաղությանը պատրաստվելու ադրբեջանական դիվանագիտական  կորպուսի հռետորաբանությանը զուգահեռ Արցախում իրականացվում է ռազմական ագրեսիա, որն էլ, ինչպես տեսնում ենք, արվում է տարածաշրջանը   լարված պահելու, Արցախյան հիմնահարցը հայաթափման  միջոցով լուծելու հստակ նպատակով և քայլերի տրամաբանական հաջորդականությամբ»,- ասաց պատգամավորը։

Ա. Հարությունյանը նշեց, ցավոք սրտի, այս քաղաքական օրակարգի դեմ հակամարտության  լուծմամբ զբաղվող միջնորդ կողմերը ոչ մի առարկայական  քայլեր չեն ձեռնարկում հարցին վերջնական և արդարացի լուծում տալու համար,  հայտարարություններից զատ չկա ոչ մի պատժամիջոց, առարկայական քաղաքական քայլ, որը կզսպի  Ադրբեջանի ահաբեկչական քաղաքականությունը, այդ իսկ պատճառով Ադրբեջանը շարունակում է ամենաթողության մթնոլորտում իրականացնել իր դավադիր ծրագիրը։

«Սրա հիմնական պատճառներից մեկն, իհարկե, Ադրբեջանի էներգառեսուրսների մասով  գոյություն ունեցող պայմանագրերն են, դրանցից կախվածությունը, մեր թշնամու կողմից այս գործոնի օգտագործման փորձերը։ Փաստացի,  ստեղծվել է  մի իրավիճակ, որում արցախահայության կենսական իրավունքների, այդ թվում  ինքնորոշման իրավունքի զիջման հաշվին փորձ է արվում բավարարել Ադրբեջանի  ծավալապաշտական նկրտումները և կեղծ խաղաղություն հաստատել  տարածաշրջանում։ Միջազգային դերակատարների դեպքում գուցե և Արցախի ժողովրդի  ճակատագիրը կարելի է երկրորդել Ադրբեջանի հետ ունեցած պայմանավորվածություններին, բայց այն, որ այդ ճանապարհով հնարավոր չէ ստանալ հարցի լուծում, նույնպես փաստ է։

Արցախն առանց հայերի թողնելու քաղաքական մտադրությունն ի սկզբանե դատապարտված է ձախողման, նման պատճառով ոչ միայն չի լինելու խաղաղություն, այլև տարածաշրջան մուտք է գործելու  նոր էսկալյացիայի և բախումների շրջան իր անկանխատեսելի հետևանքներով և արդյունքներով, որից կարող են տուժել նաև  մեր հաշվին զիջումների պատրաստ միջազգային դերակատարները»,- ասաց Ա. Հարությունյանը։