Ձեր վստահելի աղբյուրը

«Այս ռազմական սադրանքը երկար ժամանակ նախապատրաստվում էր՝ Ադրբեջանի տեղեկատվական գրոհներով, թե իբր ԼՂ պաշտպանության բանակը շփման գծի տարբեր հատվածներում խախտում է հրադադարի ռեժիմը»,-կառավարության այսօրվա նիստի մեկնարկին հայտարարեց Նիկոլ Փաշինյանը՝ հիշեցնելով, որ հունիսի 28-ին ադրբեջանական զինուժը հրետանային միջոցներով և ԱԹՍ-ներով հարվածներ է հասցրել ԼՂ պաշտպանական դիրքերին, ինչի հետևանքով  4 հայ զինծառայող է զոհվել:

Նա հայտնեց, որ ադրբեջանական հրապարակումների մտացածին լինելը ԼՂ իշխանությունների կողմից ի ցույց է դրվել, ինչի պայմաններում ակնհայտ է դառնում, որ Ադրբեջանն իրադրությունը  սրելու և ԼՂ-ն հայաթափելու հետևողական քաղաքականություն է վարում:

«Ադրբեջանի գործելակերպն ավելի ու ավելի տեսանելի կերպով հենց այդպես է ընկալվում նաև միջազգային հանրության կողմից, ինչի ամենաթարմ ապացույցը նախորդ շաբաթ ԵԽԽՎ-ում ընդունված22/56 բանաձևան է»,-ասաց Փաշինյանը և հավելեց, որ դրա 15-րդ կետում ԵԽԽՎ-ն արձանագրում է. «Վեհաժողովն չափազանց անհանգստացած է Ադրբեջանի ղեկավարության ամենաբարձր մակարդակում հայերի դեմ կիրառվող թշնամական և սպառնալից հռետորաբանությունից և կոչ է ոնւմ Ադրբեջանին մերժել նման հռետորաբանությունը և քայլեր ձեռնարկել  ինչպես ատելության խոսքի դեմ՝ այդ թվում հանրային և բարձրաստիճան պաշտոնյաների կողմից կիրառվող, այնպես էլ ատելության և հանցագործությունների դեմ պայքարելու համար»:

Գործադիրի ղեկավարը մանրամասն անդրադարձավ զեկույցին՝ շեշտելով, որ նրանում նաև առաջարկվում է խաղաղության իրականացման ցանկացած մեխանիզմում չեզոք միջազգային ներգրավվածություն ապահովել:

«Հունիսի 28-ի սադրանքը Հայաստանի և Ադրբեջանի միջև խաղաղություն հաստատելու,  ԼՂ ժողովրդի իրավունքների և անվտանգության հարցերն հասցեագրելու ջանքերը ձեզոքացնելու նպատակ ունեն»,-հայտարարեց Փաշինյանը: