Ձեր վստահելի աղբյուրը

«4 հայ զոհվեց՝ պաշտպանելով մեր հայրենիքի սահմանները, պաշտպանելով նաև մեր բարոյականությունը»,- լրագրողների հետ զրույցում ասաց երգիչ, ՀՀ վաստակավոր արտիստ  Արսեն Գրիգորյանը, ով միացել է «Հայաքվե» նախաձեռնությանը և Կենտրոն վարչական շրջանի թաղապետարանում միացավ նաև ստորագրահավաքին։

«Այս նախաձեռնությանը միացել եմ, որովհետև այս նախաձեռնությունը նպատակ ունի մեր սերը ստուգելու մեր ինքության հանդեպ մեր պետականության հանդեպ։

Միշտ ասել եմ՝ ով ասում է Արցախը մերը չէ, ինձ համար ինքը հայ չէ։ Եվ սա շատ կարևոր նախաձեռնություն է, որպեսզի ամեն մեկն արտահայտի իր սերը։ Սա ընդդեմ նախաձեռնություն չէ, սա հանուն մեր պետական ու ազգային շահերի նախաձեռնություն է։ Ով կարող է ասել, որ ցեղասպանություն չի եղել կամ կասկածանի տակ է դնում, ինձ համար հայ չէ»,- ասաց Մրոն։ 

Նրա խոսքով, այս նախաձեռնությունն արդար, բարոյականության դրսևորման նպատակ ունի։ 

«Վստահ եմ՝ շատերը կմիանան այս նախաձեռնությանը։ Կրկնում եմ՝ սա որևէ մեկի դեմ չէ, որևէ մեկին պատժելու համար չէ, սա կանխելու համար է, սա հայի արդարությունը վերականգնելու համար է»,- ասաց ՀՀ վաստակավոր արտիստը։

Ըստ նրա, նույնիսկ ամոթ է, որ Հայաստանում լինի օրենք, որ քրեականացնում է Ցեղասպանության ժխտողականությունը. «Բայց երբ տեսնում ենք այսօրվա մեր իրականությունը, կարծում եմ, դա անհրաժեշտություն է։ Երբ տեսնում ես, թե ինչ է կատարվում Արցախի հետ կապված, ես գտնում եմ անհրաժեշտություն է նման օրենքը»։