Ձեր վստահելի աղբյուրը

«Ոսկե ծիրան» միջազգային կինափառատոնն  այս տարի նշում է ստեղծման 20-րդ տարեդարձը։ Այս տարի նշվում է նաև հայ կինոյի 100-ամյակը, և փառատոնն առանձնահատուկ անդրադարձ կունենա այդ երկու հոբելյաններին։

Այսօր լրագրողների հետ հանդիպմանը փառատոնի հիմնադիր Սուսաննա Հարությունյանն ասաց՝ «Ոսկե ծիրան»-ը շարունակում է սերտ համագործակցությունը Հայաստանում  արտասահմանյան դեսպանությունների ու միջազգային կազմակերպությունների հետ:
Փառատոնն այս տարի տեղի կունենա հուլիսի 9-16-ը՝ հանրությանը ներկայացնելով մրցութային կինոնկարներ աշխարհի տարբեր երկրներից, ինչպես նաև «Երևանյան պրեմիերաներ» ծրագրով կցուցադրի ֆիլմեր ամենահեղինակավոր (Կաննի, Բեռլինի, Վենետիկի և այլն) կինոփառատոններից: Հայաստան կժամանեն կինոյի համաշխարհային դեմքեր, ովքեր իրենց փորձն ու արվեստը կներկայացնեն կինոսերներին։

Ֆրանսիայի դեսպանատան մշակութային համագործակցության հարցերով բաժնի ղեկավար Գիյոմ Նարժոլեի խոսքով՝ դեսպանատան համար կարևոր է աջակցել փառատոնին, և համագործակցությունը շարունակական կլինի, քանի որ իրենք մեծ նշանակություն են տալիս Հայաստանում արվեստի տարբեր ճյուղերի զարգացմանը:

Նա տեղեկացրեց, որ ՀՀ-ում Ֆրանսիայի Հանրապետության դեսպանության հետ համագործակցությամբ հայ հանդիսատեսը կվայելի ֆրանսիական կինոյի իսկական հրավառություն։

Ֆրանսիական ծրագրում կներկայացվեն Ժան-Պիեռ Դարդեն և Լյուկ Դարդեն եղբայրների «Ռոզետա», «Երեխան», «Անհայտ աղջիկը», «Հեծանվով տղան», «Երկու օր, մի գիշեր», այս տարվա Բեռլինի կինոփառատոնի Ոսկե արջ մրցանակակիր Նիկոլա Ֆիլիբերի «Ադամանի վրա», Կաննի կինոփառատոնի Ոսկե արմավենու մրցանակակիր Ժյուստին Տրիեի «Անկման անատոմիա», Սիլվա Խնկանոսյանի «Միչիգանից հեռու» ֆիլմերը։ Դեսպանության հետ համագործակցությամբ Հայաստան կժամանեն կինոռեժիսորներ Դարդեն եղբայրները, Կլեր Սիմոնը, Քրիս Պելըրենը։

Երևանում «Գյոթե» կենտրոնի ղեկավար, մշակույթի փորձագետ Նաթիա Միքելաձե-Բախսոլիանին կարևորեց «Արտադրված է Գերմանիայում» ծրագիրը, որի շրջանակում կցուցադրվեն Քրիստիան Փեցոլդի «Կարմիր երկինք», Վիմ Վենդերսի «Չքնաղ օրեր», Դանիել Քյոթերի «Լանդշաֆտ», Աբաս Ամինիի «Անվերջ սահմաններ», Խալեդ Ժարարի «Նոթեր տեղահանման մասին» ֆիլմերը։ Գյոթե կենտրոնի հետ համագործակցությամբ Հայաստան կժամանեն նաև ռեժիսորներ Դանիել Քյոթերը, Բերնդ Բյուդերը, Կարմեն Գրեյը։Իսրայելի դեսպանության հետ համատեղ կիրականացվի «Ֆոկուս․Իսրայել» ծրագիրը, կցուցադրվեն Միհալ Վինիկի «Վալերիան ամուսնանում է», Օրիթ Ֆոքս Ռոթեմի «Սաբայա» կինոթատրոնը», Մաայան Ռիփի «Մյուս այրին», Թոմեր Հեյմանի «Ես չեմ» ֆիլմերը։ Ծրագրի առանցքում կին ռեժիսորների դեբյուտային ֆիլմերն են։ Որպես հյուրեր Հայաստան կժամանեն ռեժիսորներ Թոմեր Հեյմանը, Միխալ Վինիկը:

Հայաստանում Եվրոպական միության պատվիրակությունը ֆինանսավորել է ֆիլմերի 50 ցուցադրություններ, ներառյալ՝ դրանց համար նախատեսված սրահներ, համապատասխան սարքավորումներ և աշխատակազմ։

Գալուստ Կիւլպէնկեան Հիմնարկութիւն և Հայաստան- Պորտուգալիա Բարեկամության միություն կազմակերպությունների հետ համատեղ կիրականացվի «Ֆոկուս․Պորտուգալիա» ծրագիրը։ Կներկայացվեն Անդրե Ժիլ Մատայի «Ծառը», Դավիդ Պինեյրուի Վիսենտի «Աստծու գառը», Մարիա Կլարա Էսկոբարի «Աքսոր» ֆիլմերը։  Առանձին կցուցադրվեն Լոկառնոյի կինոփառատոնի «Ոսկե հովազի» դափնեկիր, պորտուգալացի ռեժիսոր Պետրո Կոշտայի ֆիլմերը։ Հայաստան կժամանի նաև ռեժիսոր Անդրե Ժիլ Մատան։

Նիդերլանդների Թագավորության դեսպանությունը, ինչպես և նախորդ տարիներին, այս տարի ևս կաջակցի փառատոնային օրաթերթի լույսընծայմանը։

Կինոփառատոնին զուգահեռ հուլիսի 10-14-ը տեղի կունենա նաև Երևանի «Ոսկե ծիրան» միջազգային կինոփառատոնի արտադրական հարթակը՝GAIFF Pro Industry Platform-ըէ ներկայացնելով  սկսնակ կինոգործիչների նոր նախագծեր Արևմտյան Ասիայի տարածաշրջանից:
Ընտրված ցանկը ներառում է նախագծեր Իրաքից, Պաղեստինից, Հորդանանից, Վրաստանից, Իրանից և Հայաստանից․ շատերը համատեղ արտադրություններ են։

Հյուրերի թվում են նաև բրիտանացի պրոդյուսեր Դեյվիդ Պ. Քելլին (նրա ֆիլմերի շարքում են՝ «Ջերեմի Թոմասի փոթորիկները» (2021 թ.), որ կցուցադրվի Ոսկե Ծիրան կինոփառատոնի շրջանակներում։