Ձեր վստահելի աղբյուրը

Էնդոկրինոլոգ, սննդաբան Էլվինա Բինատովան պատմել է, թե ինչ է հարկավոր գեղեցիկ արևայրուք ստանալու համար՝ միաժամանակ խուսափելով ջրազրկումից և մարմնի վրա այլ վնասակար ազդեցություններից։

Նրա խոսքով ՝ ուլտրամանուշակագույն ճառագայթները լինում են փափուկ և կոշտ։ Դրանց ազդեցության տակ կոլագենը քայքայվում է։ Այդ իսկ պատճառով, ինչպես «Գազետա․ռու»-ի հետ զրույցում ասել է էնդոկրինոլոգը, արևի տակ երկար մնալուց առաջ անհրաժեշտ է պատրաստել մաշկը։

Բժիշկը նշել է, որ մաշկի հիպերպիգմենտացիայից խուսափելու համար անհրաժեշտ է մարմնի վրա ոչ միայն արևապաշտպան քսուք քսել, այլև բացառել ֆոլաթթվի, Բ12-ի և Բ3-ի դեֆիցիտը:

Ըստ Բինատովայի՝ շատ չոր մաշկ ունեցող մարդիկ պետք է ընդունեն պոլիչհագեցած ճարպաթթուներ, վիտամին A, E, ցինկ և բավարար քանակությամբ ջուր։ Նա նախազգուշացրել է, որ վիտամին A-ի ավելցուկը նաև կարող է մաշկը չորացնել։

«Վիտամին A-ն մասնակցում է մաշկի և լորձաթաղանթների վերականգնման նորացման գործընթացներին, մաշկի սպիտակուցների սինթեզին ՝ կերատին, կոլագեն։ Կանխում է մաշկի վնասումը ուլտրամանուշակագույն ճառագայթումից, նվազեցնում է բակտերիաների քանակը», - ասել է փորձագետը։

Նա միաժամանակ նշել է, որ հակաօքսիդանտների առանձին ընդունումը ցանկալի արդյունք չի տալիս։ էնդոկրինոլոգի խոսքով՝ վիտամին A-ն պետք է ընդունել վիտամին C-ի, E-ի և սելենի հետ։

Բացի այդ, բժիշկը խորհուրդ է տվել օրական բավարար քանակությամբ սպիտակուցներ օգտագործել, քանի որ սպիտակուցի պակասի ֆոնին վիտամիններ և հանքանյութեր ընդունելն իմաստ չունի:

Էնդոկրինոլոգը նաև ասել է, որ պետք է հետևել ջուր խմելու կանոններին, քանի որ այն անհրաժեշտ է մաշկի խոնավության ճիշտ հավասարակշռության համար:

Մաշկը խոնավացնելու համար բժիշկը խորհուրդ է տվել նաև օգտագործել միզաթթվով և հիալուրոնաթթվով կրեմ։