Ձեր վստահելի աղբյուրը

 ՀՀ տարբեր մարզերում և Երևանում մեկնարկել է «Հայաքվե» օրենսդրական նախագծի ստորագրահավաքը, որն Արցախի ինքնորոշման մերժումը քրեականացնող օրենսդրական նախագիծ է։ Եթե 50 000 քաղաքացի ստորագրությամբ միանա նախագծին, ապա  օրինագիծը կքննարկվի ԱԺ-ում։

Կենտրոն վարչական շրջանի համայնքապետարանում «Հայաքվե» նախաձեռնությանը միացան «Որդիների կանչ» ՀԿ անդամները։  Զոհված զինծառայողի հայր Արա Ռոստոմյանը լրագրողների հետ զրույցում պարզաբանեց, թե որն է նախաձեռնությանը միանալու նպատակը։

«Այս նախաձեռնության մի հատվածը վերաբերում է Ցեղասպանության ժխտմանը, քրեական  օրենսգրքում ավելանում է հոդված՝ ցեղասխանության ժխտման մասով։ Երկրորդ․ Արցախն այլ երկրի կազմում ճանաչելը կամ խոսույթը նույնպես քրեականացվում է։ Այս առումով «Հայաքվե»-ն՝  որպես քաղաքացիական նախաձեռնություն, առաջին անգամ է տեղի ունենում Հայաստանում։ Սա հարմար առիթ է, որպեսզի  քաղաքացիներն իրենց նախաձեռնությամբ օրենսդրական նախագիծ առաջադրեն ԱԺ»,- պարզաբանեց Արա Ռոստոմյանը։

Նա նշեց, որ մինչ նախագիծը շրջանառության դրվելը, նախաձեռնության անդամներն այցելել են «Որդիների կանչ» ՀԿ և մանրամասն քննարկելուց հետո որոշվել է օժանդակել նախաձեռնությանը։

«Այսօր ՀԿ-ի անդամներով եկել ենք և մեր քաղաքացիական պարտքն ենք կատարում»,- հավելեց «Որդիների կանչ» ՀԿ անդամը։

Նրա կարծիքով՝ եթե ԱԺ-ում «խելոք» գտնվեն, ապա այս նախաձեռնությունը կընդունեն,եթե ՝ ոչ, ապա հաջորդ քայլը կլինի 300 000 ստորագրությունը, որի դեպքում հանրաքվեի անցկացումն անխուսափելի կլինի։

Իսկ ահա ԱԺ նախկին պատգամավոր, ըմբշամարտի աշխարհի և Եվրոպայի չեմպիոն Արսեն Ջուլֆալակյանը «Հայաքվե»-ին միացել է մի շարք պատճառներով։

«Այս արատավոր պատմական ընթացքը, որը տեղի է ունենում հայ ազգի, պետականության հետ, վաղուց պետք է կանգնեցված լիներ։ Բազմիցս առիթ եմ ունեցել այդ մասին խոսելու ՝ չգիտեմ ինչու , դեռ ձգձգվում է։ Մենք թույլ ենք տալիս այս ազգակործան քաղաքական ուժին շարունակել նորանոր աղետներ բերել Հայաստանին  և  հայ ժողովրդին։ Այս նախաձեռնությունն այն քայլերից մեկն է, որը հնարավորություն կտա՝ կանխելու այդ աղետաբեր ընթացքը»,- ասաց Ջուլֆալակյանը։

Նախկին պատգամավորն այն համոզմանն է, որ այս փոփոխությունը կարող է նպաստել իր պատկերացրած փոփոխությանը՝ օր առաջ իշխող քաղաքական ուժի հեռացմանը։

«Քանի մեր տունը չենք մաքրել ներքին թշնամուց, արտաքին թշնամու դեմ չենք հաջողելու։ Չկա իրական խաղաղություն, ուղղակի պետք է կույր լինել, որպեսզի դա չնկատել։ Բոլոր տրված խոստումները ոչ միայն չի իրականացվել, այլև կեղծվել են։ Ինչի՞ եք սպասում, պետք է դուրս գալ և հայտնել անհամաձայնությունը»,- իր խոսքում ասաց Ջուլֆալակյանը։

Մեծ ակտիվություն է նկատվում նաև Շնեգավիթի համայնքապետարանում, որտեղ էլ երգչուհի, ՀՀ վաստակավոր արտիստ Շուշան Պետրոսյանը հարյուրավոր քաղաքացիների հետ  մասնակցել է ստորագրահավաքին։