Ձեր վստահելի աղբյուրը

Երևանի քաղաքապետարանի գործակարգավարական խորհրդակցության ժամանակ քաղաքապետաի տեղակալ Սուրեն Գրիոգրյանը զեկուցեց Արզումանյան փողոցի 10 և 17 վթարային շենքերի փոխարեն նոր շենքեր կառուցելու և այնտեղի բնակիչներին նոր բնակարաններով ապահովելու ծրագրի ընթացքը:

Գրիգորյանի խոսքով՝ քաղաքապետարանը պայմանագիր է կնքել գնահատող կազամկերպության հետ, 90%-ից ավել գույքերի գնահատումն ավարտվել է և ընթացիկ շաբաթվա ընթացքում կավարտեն մնացած մասը և պատրաստ կլինեն քաղաքացիների հետ պայմանագրերի կնքմանը:

«Եթե անխոչընդոտ ընթացք ունենանք, այսինքը մի ֆանտաստիկ սցենար եմ ասում՝ ենթադրենք դատական պրոցես չունենանք, ենթադրենք որևէ մեկը չի բողոքարկում և չի ասում. «չէ ինձ վթարային շենքից մի հանեք», ապա քանդման աշխատանքները ե՞րբ կարող ենք սկսել»,-հարցրեց նիստը նախագահող Տիգրան Ավինյանը:

Սուրեն Գրիգորյանը պատասխանեց, որ նմանդ ֆանտաստիկ սցենարն խաթարող դեպքեր արդեն կան և հավելեց. «Ֆանտաստիկ, թե ոչ ֆանտաստիկ սցենարով՝ կհաշվարկենք և հաջորդ շաբաթ կասենք»:

Ավինյանը հրացրեց, թե արդյո՞ք ճիշտ է հիշում, որ որոշ բնակիչներ դիմել են դատարան՝ բողոքարկելով շենքերի վթարային լինելը և, ստանալով դրական պատասխան, հիշեցրեց, որ խոսքը գնում է Արզումանյան փողոցի 4-րդ աստիճանի վթարային թիվ 10 և 17 շենքերի մասին:

Գրիգորյանը տեղեկացրեց, որ այդ բնակիչների մուտքը նվազ վատթար վիճակում է, դրա համար էլ դատարան են դիմել:

«Ես ուզում եմ հասկանալ, թե ինչ է նշանակում մուտքը նվազ վատթար վիճակում էր, այսի՞նքը՝ կողքի մուտքը որ փլվի, դեռևս հույս կա, որ այս մի մուտքը չի՞ փլվելու»,-արձագանքեց Ավինյանը:

Գրիգորյանը հաստատեց նման մտածելակերպը և հույս հայտնեց, որ քաղաքապետարանի տրամադրած փաստաթղթերին ծանոթանալուց հետո բնակիչներն այդ կարծիքին չեն մնա: