Ձեր վստահելի աղբյուրը

«Սահմանադրականությունը արժեքահեն է և, ցավոք, այսօր ունենք սահմանադրական ճգնաժամ, հետընթաց»,-«Այլընտրանքային նախագծեր խմբի» կազմակերպած «Սահմանադրության օրվա նախօրեին. հակասահմանադրական իրականություն» թեմայով պանելային քննարկման ժամանակ ասաց սահմանադրագետ Գոհար Մելոյանը և նշեց, որ վերջին 5 տարիների ընթացքում առկա են ակնհայտ փաստեր սահմանադրական մշակույթից ռեգրեսի միտման մասին:

Նրա խոսքով՝ սահմանադրականությունը Սահմանադրության կյանքի կոչված հիմնարար դրույթներն են՝ թղթին գրված նորմերի իրացումը կյանքում, Սահմանադրության հիմնարար սկզբունքների պահնպանումը:

Գոհար Մելոյանը նշեց, որ Սահմանադրության անփոփոխ հոդվածների հիմնական երեք դրույթները՝ իշխանությունների տարանջատման, օրինականության, իրավունքի գերակայության պահանջները գործող իշխանությունները տոտալ ոտնահարում են: 

«2018 թվականի իշխանափոխությունից հետո երկրի գործադիր իշխանության ղեկավարի՝ վարչապետի կոչով շրջափակվեց օրենսդիր մարմինը, այսինքը՝ իշխանությունների տարանջատման սկզբունքը բացահայտորեն ոտնահարվեց: Դրան հաջորդեց դատարանները շրջափակելու երկրի ղեկավարի կոչը՝ կրկին անհետևանք այն հնչեցնող պաշտոնատար անձի համար»,-հայտարարեց Մելոյանը:

Նա նշեց, որ վերջին ընտրությունից հետո Խորհրդարանում իշխող ուժը որակյալ մեծամասնություն ստացավ և սահմանադրություն փոխեց, հետո էլ ՍԴ անդամների նկատմամբ հետապնդում սկսվեց և հակասահմանադրական փոփոխություններ տեղի ունեցան:

Գոհար Մելոյանի խոսքով՝ 2015 թվականի սահմանադրական փոփոխությամբ խորհրդարանը վերահսկելու է գործադիրին, բայց այսօր հակառակն է տեղի ունենում: