Ձեր վստահելի աղբյուրը

«Մենք ի սկզբանէ հռչակել ենք գաղափարախոսություն և հավաքվել ենք ոչ թե ինքնանպատակ, այլ գաղափարի շուրջ, որը պայմանավորված է Սահմանադրության օրվա և պետական խորհրդանիշների խորհրդով, որպեսզի դա օգտագործենք և իշխանությունից վռնդենք այն պաշտոնյաներին, ովքեր իրենց ամենօրյա գործունեությամբ խախտում են ՀՀ Սահմանադրությունը, անարգում են պեության խորհրդանիշներն ու գործում ժողովրդին ու պետությանը հակառակ»,-Panorama.am-ին ասաց հասարակական-քաղաքական գործիչ Էդգար Ղազարյանը, որը գիշերել է Բաղրամյան 26-ում գտնվող նախագահական նստավայրի դիմաց։

Նրա  նախաձեռնած «Արժանապատվության հեղափոխություն» շարժման ակցիան շարունակվում է։ 

Ղազարյանի խոսքով, իրենք նպատակ ունեն նախագահականի մոտ ստեղծել հսկիչ անցագրային կետեր, պաշտոնյաների և վերջին շրջանում այստեղ տեղափոխված Նիկոլ Փաշինյանի մուտքն ու ելքը վերահսկելու համար։

«Մենք պետք է հասկանանք, թե ինչո՞ւ են գնում այնտեղ, ի՞նչ որոշումներ են կայացնում, և այդ որոշումները որքանո՞վ են բխում հայ ժողովրդի շահերից»,-ասաց նա։

Ղազարյանը գիտի, որ  նպատակին հասնելու համար հարկավոր է  լայն հասարակական աջակցությամբ։

«Եթե կլինի համապատասխան աջակցություն՝ կշարունակենք, իսկ եթե ոչ, ապա այս էտապում կամփոփենք և կմտածենք հաջորդ գործողությունների մասին. Հանձնվել և մեր նպատակներից հետ կանգնել չենք պատրաստվում»,-ասաց նա։

Հարցին, թե ի՞նչ արդյունքներ է ակնկալում հավաքից և ի՞նչ աջակցութուն հասարակությունից, Ղազարյանը պատասխանեց.

«Հաջողությունը կարող է լինել մեկ օրում, մեկ վայրկյանում։ Ես կարծում եմ, որ մեր խոսքը հասարակության համար պետք է լինի տեսանելի և վտանգները կանխելու համր պետք է իրենց ֆիզիկական ներկայությունը։ Իրավիճակի վերահսկողությունը հասարաակությունը պետք է վերցնի իր ձեռքը, քանի որ մեր երկիրը փաստացի չի կառավարվում։ Իմ խորին համոզմամբ հասարակական տրամադրությունները այս իշխանություններին դեմ են, դա են վկայում բազմաթիվ սոցհարցումներն ու հասարակության տարբեր շերտերը ներկայացնող ինստիտուցիոնալ միավորներ են։ Շատ քիչ թվող մարդիկ են ներկա, բայց ոստիկանական հսկայական ուժեր են կենտրոնացած, դա նշանակում է որ նրանք անգամ մարդկանց փոքր թվից այսպիսի վախ ունեն»։

Էդգար Ղազարյանն ընդգծեց, որ գուցե մարդիկ վախենում են կորցնել աշխատանքը, դեռ հավատում են կեղծ խաղաղությանը, բայց իրավիճակը գնալով սրվում է և ժողովուրդը պետք է դուրս գա փողոց։ 

«Մեր երկիր պատերազմ բերած մարդը մեզ սպառնում և վախեցնում է հետագա պատերազմներով, բայց իրականում պատերազմ եղել է իր իշխանության օրոք։ Նրանք տապալում են բոլոր բանակցությունները, ոչ զենք են առնում, ոչ բանակն են պահում։ Իսկ թշնամին էլ մտածում է, որ հրաշալի միջավայր է ստեղծված իրենց ռազմական գործողությունները իրականացնելու համար։ Այս իրավիճակից միակ ելքը նրան իշխանությունից հեռացնելն է»,-ասաց Ղազարյանը։

Ակցիային մասնակից թոշակառու քաղաքացին էլ նշեց, որ իր տարիքում վախենալու և կորցնելու բան չունի ու հույս ունի, որ շարժումը որևէ արդյունք կտա.

«Սպասում եմ, որ հեղաշրջում լինի, մենք էլ կարողանանք մեր գոյությունը պաշտպանել։ Նիկոլին ասեք, որ հերիք եղավ, ստի տոպրակը գցեցիր ուսիդ, եկար, կամաց-կամաց սաղ ժողովրդին փակեցիր»։

Մանրամասները՝ տեսանյութում։