Ձեր վստահելի աղբյուրը

«Մոտենում է այն պահը, երբ վարչապետի պաշտոնակատարը Ստեփանակերտն անվանի Խանքենդի»,-ֆեյսբուքյան իր էջում գրել է քաղաքագետ Ստեփան Դանիելյանը։

Ի՞նչ ի նկատի ունի քաղաքագետը. Panorama.am-ի հետ զրույցում Ս. Դանիելյանը վկայակոչեց թվիթերում Հարավային Կովկասի հարցերով Եվրամիության հատուկ ներկայացուցիչ Տոյվո Կլաարի գրառումը, որտեղ Արցախի մայրաքաղաքը նշված է որպես Խանքենդի։

«Բաքու-Ստեփանակերտ/Խանքենդի իրական երկխոսությունը պետք է սկսվի՝ նպատակ ունենալով ապահովել բռնությանը այլընտրանքներ, ձևավորել այնքան անհրաժեշտ վստահություն և ապահովել արժանապատվություն: ԵՄ-ն անհամբեր սպասում է բրյուսելյան եռակողմ հանդիպմանը Հայաստանի և Ադրբեջանի առաջնորդների հետ»,-երեկ գրել էր Կլաարը։


Քաղաքագետն ընդգծեց՝ Տոյվա Կլաարը ԵՄ պաշտոնյան է, որը զբաղվում է  նաև Արցախի հարցերով։

«Եթե նման հայտարարություն  է արել, ես կարծում եմ, որ ունի ստվերային պայմանավորվածություն Հայաստանի վարչապետի հետ։ Առանց դրա նա նման հայտարարություն չէր անի։ Եվ եթե Հայաստանի կառավարությունը, ԱԳՆ-ն բողոք չեն հղում դրա վերաբերյալ, նշանակում է, որ այո, նման ստվերային պայմանավորվածություն կա»,-ասաց Ս. Դանիելյանը։

Նա ընդգծեց, այս շրջանակում հաշվի առնելով գործող վարչապետի՝ մինչև այս արված հայտարարությունները՝ Գորիս-Կապան ճանապարհին հարակից գյուղերի վերաբերյալ , որոնք լեգիտիմացրեցին ադրբեջանի հարձակումն ու այդ հատվածի գրավումը, նաև հաշվի առնելով անկլավների մասին հայտարարությունները, ապա գործող վարչապետը Ստեփանակերտը կանվանի Խանկենդի՝ հաջորդ քայլն անելով Արցախն Ադրբեջանի կազմում ճանաչելու ուղղությամբ։

«Քանի որ այդ ճանաչումն արվել է խոսքերի մակարդակում, որևէ տեղ որևէ ստորագրություն չկա, Պրահայում ասում են՝ ինչ-որ բան է ստորագել, այն մեզ հասանելի չէ, այդ հրապարակային հայտարարությունը կարող է լինել հաջորդ քայլը»,-ասաց քաղաքագետը։

Նման դեպքում ինչպիսի՞ն կլինի Արցախի ժողովրդի արձագանքը։

«Արցախը շրջափակված է, բնակչությունը՝ գերի ու պատանդ վիճակում։ Ի՞նչ արձագանք եք սպասում։ Եթե արձագանք լինի, պետք է լինի Հայաստանում»,-ասաց քաղաքագետը։