Ձեր վստահելի աղբյուրը

«Հայաստան» խմբակցության քարտուղար Արծվիկ Մինասյանը ճեպազրույցի ժամանակ հայտնեց, որ ընդդիմադիր խմբակցություններ դեռ չեն քննարկում Թագուհի Թովմասյանի պաշտոնանկության փաստով ՍԴ դիմելու հարցը:

Անդրադառնալով նախադեպին՝ ԱԺ նախկին պատգամավոր Նաիրա Զոհրաբյանի՝ նույն պաշտոնից հեռացման դեպքում ՍԴ-ի կայացրած որոշմանը, Մինասյանն ասաց. «Նաիրա Զոհրաբյանի դեպքում դիմումը ՍԴ, իմ կարծիքով, որոշակի իրավական նրբությունների պետք է բավարարեր, ինչը չէր ապահովվել: Բայց կա ՍԴ որոշումը, որով վերլուծված որոշակի նորմեր կան և որով հանձնաժողովի նախագահի պաշտոնանկությունը ընդունվել է որպես Սահմանադրությանը համապատասխանող:

Նա հիշեցրեց, որ այն ժամանակ նաիրա Զոհրաբյանի դեպքում դիմումը վերաբերում էր նրան, թե արդյո՞ք «Իմ քայլը» խմբակցությունը իրավունք ունեցել է նման որոշման նախագիծ ներկայացնելու, թե՞ հանձնաժողովի նախագահի պաշտոնանկության նախաձեռնությունը վերապահված է միայն այն խմբակցությանը, որն առաջադրել է հանձնաժողովի նախագահին, իսկ ՍԴ-ն հայտնել էր, որ բոլոր խմբակցություններն այդ իրավունքն ունեն:

«Պետք է հար ուղղվեր, թե արդյո՞ք «ԱԺ կանոնակարգ» օրենքի 150-րդ հոդվածով սահմանված հիմքերը, թե որ դեպքում է դադարում հանձնաժողովի նախագահի լիազորությունները, այն է՝ երբ դադարում է նրա պատգամավորական լիազորությունները, հրաժարական է տվել, կամ եթե հեռացվել է խմբակցությունից, հիմք կարող էին հանդիսանալ Զոհրաբյանի հեռացման համար:
Եթե թվարկած դեպքերը չկան՝ լուրջ հարց է, թե արդյոք կարող են պաշտոնանկ անել հանձնաժողովի նախագահին: Աշխատանքների կատարման մեջ թերացում Թովմասյանի դեպքում չկա, իսկ ԱԺ խորհրդի նիստերին չմասնակցելով, նա, մեծ հաշվով, քաղաքական տեսակետ է հայտնել, որովհետև անիմաստ է համարել նիստերին մասնակցելը, քանի որ դրանք ձևական բնույթ են կրում և այստեղ կանոնակարգի խնդիր էլ կա»,-ասաց Մինասյանը և հավելեց. «Թագուհի Թովմասյանն այն հանձնաժողովի նախագահն է եղել, որը թե՛ մարդու իրավունքների պաշտպանության ոլորտում, թե՛ Արցախի ժողովրդի ինքնորոշման իրավունքի պաշտպանության հարցերում, թե փաստաբանների դեմ կատարված բռնությունների հարցի քննարկման դեպքում մշտապես ակտիվ է եղել:
Ես չեմ տեսնում այսօր որևէ այլ հանձնաժողովի նախագահ, որը նման ակտիվություն ցուցաբերեր: Կան ակտիվները, բայց մասշտաբի առումով Թովմասյանի աշխատանքի արդյունավետությունը կարծում եմ այս պահին քննադատության չէր կարող ենթարկցվել»: