Ձեր վստահելի աղբյուրը

«Անկեղծորեն տարակուսած եմ, թե ինչու այստեղ էկոնոմիկայի նախարարության ներկայացուցիչը չկա, որպեսզի բացատրի, թե մեր գյուղատնտեսության մեջ այդ ի՞նչ արմատական փոփոխություններ են եղել, որ ներկայում ջրի ավել պահանջարկ է առաջացել»,-խորհրդարանի արտահերթ նիստում ասաց «Հայաստան» խմբակցության պատգամավոր Արթուր Խաչատրյանը:

Նա հայտարարեց, որ կառավարությունը Սևանից ջրի լրացուցիչ բացթողնման համար հիմնավորումները թերի է ներկայացրել, չի նշել, թե ինչքա՞ն տեղումներ է եղել այս տարի, ջերմաստիճանը նանխորդ տարիների համեմատ քանի՞ աստիճանով է բարձրացել, մինչև ոռոգման սեզոնը Սևանից որքա՞ն ջուր է բաց թողնվել:

Խաչատրյանը հայտնեց, որ ԿԲ-ի զեկույցի համաձայն՝ Հայաստանում պարենային գներն ավելացել են, քանի որ ցանքատարածությունները նվազել են:

«Ցանքատարածությունները նվազել են, մյուս երևույթների մասին տեղեկություն չունենք, բա ինչո՞ւ ենք Սևանից ավել ջուր վերցնում: Արցախ էլէկտրաէներգիա չի գնում, ըստ կառավարության՝ արևային համակարգեր են ներդրվել և ոռոգման համակարգն արդիականացվում է»,-ասաց ընդդիմադիր պատգամավորը և տարակուսեց, թե այդ դեպքում ինչո՞ւ է լրացուցիչ 70 մլն մ³ ջուր վերցվում Սևանից:

Խաչատրյանը նաև հիշեցրեց, որ բյուջեով 22 մլրդ դրամ էր հատկացվել ջրամբարաշինությանը, բայց օգտագործվել է ընդամենը 9 մլրդա:

«Հայաստան» խմբակցության քարտուղար Արծվիկ Մինասյանն էլ հայտարարեց, որ լրացուցիչ ջրառը լրջորեն կհարվածի Սևանա լճի էկոհամակարգին և խմբակցությունը դեմ է քվեարկելու նախագծին: