Ձեր վստահելի աղբյուրը

Ոստիկանության կենտրոնական բաժանմունքում փաստաբանին բռնության ենթարկողներին պատժի ենթարկելուն ուղղված բոլոր ակցիաներն անօգուտ են եղել։ Այսօր էլ փաստաբանները հայտարարեցին եռօրյա գործադուլի մասին։ Նրանք պատրաստել են «Փաստաբանության թշնամի» հավաստագիրը, որը պատրաստվում են հանձնել ոստիկանության պետ Արամ Հովհաննիսյանին։



«Նախորդ անգամ՝ մեր մեկօրյա գործադուլը նախազգուշական էր։ Մենք երկնքից աստղեր չէինք ուզում իջեցնել, այլ ուզում էինք պետական մարմինների կողմից իրավական վարքագծի դրսևորում  տեսնեինք»,-ասաց փաստաբան Գոռ Գևորգյանը։

Նա նշեց, ԱԱԾ քննչական դեպարտամենտը կասեցրել է փաստաբանի նկատմամբ բռնության ենթարկած ոստիկանների պաշտոնավարումը, սակայն ոստիկանության պետն անդրդվելի է՝  նա չձեռնարկեց  ծառայողական քննություն,  չեղավ  ոստիկանների լպաշտոնավարման կասեցում։ Անգործությունը փաստաբանները որակում են որպես ոստիկանների գործողությունների խրախուսում։

«Մինչև վերջ ոստիկանության պետը մնաց անդրդվելի ու խրախուսեց ոստիկանների գործողությունները, երբ չկա համահունչ արձագանք, ապա դա որակվում է որպես խրախուսում։ Դրա համար մեր ուշադրությունը սևեռվեց այն ուղղությամբ, որը խրախուսում է  փաստաբանի նկատմամաբ բռնությունը»,-ասաց նա։

Գևորգյանը նշեց, փաստաբանները միշտ խոչընդոտում են ուժային կառույցների հակաիրավական գործողություններին։

«Ժողովրդական լեզվով ասած, մենք խանգարում ենք նրանց ապօրինության գործել։ Շատ դեպքերում երբ ունեն իրենց պատկերացմամբ չբացահայտված հանցագործություններ, փաստաբանների արագ արձագանքաման շնորհիվ է, որ չեն թողնում մարդկանց խոսշտանգել։ Հնուց եկած մեթոդի համաձայն, հանցագործությունները բացահայտվում են խոշտանգումների շնորհիվ, երբ ցուցմունք չեն տալիս, ուժի գործադրմամբ փորձում են ցուցմունք կորզել, հեռախոսը վերցնել և այլն։ Մեր դերակատարումը խոչընդոտում է իրենց հակաիրավական վարքագծի դրսևորմանը»,-ասաց նա։

Գոռ Գևորգյանն ընդգծեց, բռնության ենթարկված ոստիկաններն ունենալու են փաստաբանի կարիք, սակայն չեն ունենալու նրանց պաշտպանությունը, օգնությունը։

«Այդ պարագայում ինչպե՞ս են իրացնելու իրենց իրավունքի պաշտպանությունը»,-ասաց նաէ ավելացնելով,  եթե պատշաճ արձագանք չեղավ, ապա հաջորդ բողոքի ակցիան լինելու է ավելի մասշտաբային ու պարալիզացնելու է իրավական համակարգի աշխատանքը։

Նշենք, որ Գոռ Գևորգյանը ֆեսբուքյան իր էջում ծանուցել է.

«Հանուն արդարադատության, հանուն իրավական առողջ պայքարի և հանուն տեսակի պահպանության միանում եմ փաստաբանների գործադուլին և 11.07.2023 թվականից մինչ 13.07.2023 թվականը հայտարարում եմ գործադուլ՝ հրաժարվելով բոլոր տեսկի իրավական օգնություն տրամադրելուց»։