Ձեր վստահելի աղբյուրը

Ստեփանակերտում «Միջանցքի Ապաշրջափակման ժողովրդական շարժման շտաբ»-ի նախաձեռնած բողոքի ակցիային հանրային գործիչ Արթուր Օսիպյանն ասել է, որ Ադրբեջանը հստակ նշում է իր նպատակը՝ Արցախի ժողովրդին սովի մատնել և ստիպել ինտեգրվել։

«Միակ ելքն  ամեն գնով միջանցքը բացելն է»,- նշել է նա։ 

Նախաձեռնող խմբի անդամ Դավիթ Վանյանը «Արցախպրես»-ի հետ զրույցում ասել է, որ «Միջանցքի ապաշրջափակման համաժողովրդական շարժման» նպատակն է հայտարարել միջանցքը բացելու արշավ։

«Եկել է պահը, որ մենք ցույց տանք մեր միասնականությունը, ցույց տանք, որ մենք անտարբեր չենք ստեղծված իրավիճակի, մեր երեխաների ապագայի, մեր ճակատագրի հանդեպ։ Մեր հավաքին են միացել զոհված հերոսների մայրեր, կանայք ու երեխաներ։ Լռելով ոչնչի չենք հասնի, մենք մեր ձայնը պետք է լսելի դարձնենք աշխարհին։ Խանութներում սննդամթերք գրեթե չկա, մեր  երեխաները քաղցի  շեմին են։ Արցախի ժողովուրդն ինքը պետք է որոշի իր ճակատագիրը»,-ասել է Դ. Վանյանը։

Ակցիայի մասնակիցների հետ հանդիպեց  Արցախի Հանրապետության պետական նախարար Գուրգեն Ներսիսյանը, ով ասաց. «Բոլորս միակարծիք ենք, հասկանում ենք, որ համաժողովրդական  շարժումն է իրավիճակից դուրս գալու միակ ելքը և այդ ժամանակ բոլորս միասնաբար առանց տարբերակման՝ պաշտոնատար անձ,  պետական ծառայող, մեկ անձի պես ամբողջ ժողովուրդը միասնաբար մասնակցելու է համաժողովրդական շարժմանը»։ 

Ակցիայի մասնակիցները հայտարարեցին, որ առաջիկա օրերին ավելի մեծ մասշաբի ակցիա են իրականացնելու, որի մասին նախապես կհայտարարեն։