Ձեր վստահելի աղբյուրը

ԱԺ արտահերթ նիստում առաջին ընթերցմամբ քննարկվել է ««Կառավարության կառուցվածքի և  գործունեության մասին» օրենքում լրացում կատարելու մասին» օրենքի նախագիծը, որով առաջարկվում է օրենքի 7-րդ հոդվածը լրացնել հետեւյալ բովանդակությամբ նոր մասով, ըստ որի` վարչապետն իրավասու է ձևավորելու միջազգային դատարաններում դատավորի պաշտոնում Հայաստանի Հանրապետության կողմից առաջադրվող թեկնածուների ընտրության հանձնաժողով և հաստատելու դրա աշխատակարգը, ինչպես նաև հաստատելու միջազգային դատարաններում դատավորի պաշտոնում Հայաստանի Հանրապետության կողմից առաջադրվող թեկնածուների ընտրությանը մասնակցելու համար անհրաժեշտ փաստաթղթերի ցանկը, հաստատելու կամ մերժելու ընտրության արդյունքում հանձնաժողովի կազմած թեկնածուների ցուցակը:

Միջազգային իրավական հարցերով ներկայացուցիչ Եղիշե Կիրակոսյանի տեղեկացմամբ, առաջարկվող կարգավորման ընդունման պարագայում հնարավոր կլինի վարչապետի որոշմամբ կարգավորել Եվրոպական դատարանում Հայաստանի Հանրապետությունից ընտրվող դատավորի ընտրության ընթացակարգը և թեկնածուներին ներկայացվող պահանջները:

Զեկուցողի խոսքով Եվրոպական դատարանում դատավորի պաշտոնավարման ժամկետն ինը տարի է` համաձայն Կոնվենցիայի, և հաջորդ տարվա սեպտեմբերին լրանում է դատավորի պաշտոնավարման ժամկետը, հետևաբար, մինչև ընթացիկ տարվա դեկտեմբեր ամսի ավարտը, ՀՀ-ն պետք է Եվրոպայի խորհրդին ներկայացնի երեք հոգուց բաղկացած թեկնածուների ցուցակ, որը հետո արդեն, ըստ ներքին կանոնակարգերի ևԿոնվենցիայի, պետք է անցնի ընտրության հերթական փուլերը:

«Հայաստան» խմբակցության պատգամավոր Արծվիկ Մինասյանը հարցրեց՝ արդյո՞ք իրավաչա՞փ է, որ վարչապետին է այդ իրավասությունը տրվում, այլ ոչ թե կառավարությունը։

Նիստին ներկա ՆԳՆ փոխնախարար Արփինե Սարգայանն արձագանքելով հարցին՝ ասաց. «Եվրոպական դատարանի դատավորի ընտրության կարգում արդեն իսկ բավական շատ ֆիլտրող գործիքակազմ կա, և, ըստ էության, անկախ նրանից, թե պետությունն ինչպիսի ընթացակարգ ունի, եվրոպական դատարանն ունի իր չափանիշները։ Եվ մեր փոփոխությունները կատարվում են հենց այդ չափանիշների պահպանմամբ»։

Արծվիկ Մինասյանը հարցրեց նաև Եղիշե Կիրակոսյաին, թե ի՞նչն է խանգարում, որ այս իրավասությունը վերապահվի կառավարությանը։ Նա ասաց. «Կարծում եմ՝ վարչապետի ՝ արտաքին քաղաքականության ընդհանուր համակարգման լիազորությունից ուղղակիորեն բխում է  այս լիազորության նախատեսումը։ Կառավարությանը նման լիազորություն վերապահելը, ըստ իս, ավելորդ բարդացնում է, քանի որ արդեն իսկ հանձնաժողով է ստեղծվել, որը պրոցեսը տանելու է առաջ»։