Ձեր վստահելի աղբյուրը

Ստեփանակերտի Վերածննդի հրապարակում հանրահավաքից հետո քաղաքացիները երթով հասել են ռուսական խաղաղապահ առաքելության տեղակայման վայրը։

«Համբերությանը չափ կա։ Պահանջում ու խնդրում ենք կատարել ձեր պարտականությունները, մի եղեք անտարբեր։ Իրավիճակը գնալով  վատանում է։ Արցախում ապրում են մարդիկ, որոնք ունեն իրավունքներ։ Եթե արցախյան հողում արցախցի չլինի, ապա խաղաղապահներ այստեղ նունպես չեն լինի։ Ո՞ւմ են պետք խաղաղապահներ, եթե այս հողում չլինեն խաղաղ բնակիչներ։

Կանգնեցեք ցեղասպանությունը, ազատություն Արցախին, բացեք կյանքի ճանապարհը»,- կոչով արցախցիները դիմեցին ռուսական խաղաղապահներին։

Արցախի Հանրապետության պետական նախարար Գուրգեն Ներսիսյանն ասաց, որ իրենց պահանջը պարզ բան է՝ բացել Արցախի կյանքի ճանապարհը։

«Արցախի ժողովուրդը 2020 թ. նոյեմբերի 9-ի եռակողմ հայտարարության թիվ մեկ շահառուն է։ Եթե հայտարարության կողմերից որևէ մեկը չի կատարում իր ստանձնած պարտականությունը, չի նշանակում, որ դրա բոլոր ծանրագույն հետևանքները պետք է իր վրա կրի արցախցին։

Արցախի ամբողջ ժողովրդի խոսքն ենք փոխանցում՝ երբ Արցախը լիակատար շրջափակման մեջ է, բայց մենք տեսնում ենք ուղաթիռների ամենօրյա թռիչքներ, դա ընկերական, բարեկամական, գործընկերային չէ»,- ասաց Ներսիսյանը։

Նա հայտնեց, որ պայմանավորվածություն է ձեռք բերվել և մի քանի հոգով կհանդիպեն ռուս խաղաղապահների հրամանատարի հետ։

«Ասկերանից մեր քաղաքացիներն այս հատվածում վրաններ են տեղադրում, սպասում պահանջի կատարմանը, իսկ մյուս մասը վերադառնում է  Ստեփանակերտ։ Խաղաղապահների համանատարի հետ հանդիպումից հետո մենք կրկին կհավաքվենք Վերածննդի հրապարակում՝ ներկայացնելու մեր հետագա անելիքները։

Մենք չպետք է թույլ տանք, որպեսզի Արցախում լինեն մահեր, զորեր ու նոր միայն դրանից հետո արթնանան միջազգայն դերակատարների կամ միջնորդների խիղճը, ուշադրությունը սկսի սևեռվել Արցախի վրա։ Իրավունք չունենք հասնել այդ կետին»,- ասաց նա։