«Ժողովուրդ». Գարեջրի փառատոնին շատ արտադրողներ չեն մասնակցի
«Ժողովուրդ» թերթը գրում է.
«Հուլիսի 22-23-ը Երևանի Զաքյան փողոցում տեղի է ունենալու գարեջրի փառատոն, որի նպատակն է հանրությանը ներկայացնել հայկական գարեջրի տեսականին, առանձնահատկությունները, ավանդույթները և զարգացնել քաղաքային տուրիզմը, ինչպես նաև հայկական շուկայում գարեջրի արտադրությամբ զբաղվող ընկերություններին համախմբել մեկ հարթակում: Այս տարի, սակայն, համախմբվածության և գարեջրի տեսականու մասով խնդիրներ կան, կարծես թե:
«Ժողովուրդ» օրաթերթը ահազանգ ստացավ, որ կազմակերպիչները նախորդ փառատոնի մասնակիցներին զեղչեր են խոստացել, չեն արել, դրան գումարած՝ այս տարի երաշխիքային մոտ 200.000 դրամ գումար են պահանջել ընկերություններից, նաև այլ դժվարություններ են առաջացրել այս տարի՝ փոխելով մասնակցության պայմանները, ինչի արդյունքում շատ արտադրողներ չեն մասնակցի այս փառատոնին: Հավանաբար կլինեն մի քանի խոշոր ընկերություններ, որոնք ֆինանսական դժվարությունները կհաղթահարեն, իսկ մանր արտադրողների մեծ մասը, որոնք և գարեջրի բազմազանությունն են ապահովում, չեն մասնակցի:
Տեղեկացանք, որ փառատոնի կազմակերպման աշխատանքներով զբաղվում է «ԷվենտՏուրա» ընկերությունը: Գարեջրի համտեսը համեմելու համար ներգրավված կլինեն մինչև 20 ռեստորանային ընկերություններ և կներկայացնեն սնունդ, որը կարելի է համադրել գարեջրի հետ։
Փորձեցինք կապվել «ԷվենտՏուրա» ընկերության հետ՝ ճշտելու, թե ովքեր են մասնակցելու փառատոնին, ինչու են կազմակերպիչները փոքր արտադրողների համար արհեստական խոչընդոտներ ստեղծում, սակայն մեզ փոխանցեցին, որ մեզ հետ կապ կհաստատի տնօրենը, սակայն այդպես էլ որևէ մեկը մեզ հետ կապի դուրս չեկավ մինչև օրվա ավարտը:
ArmLur.am-ը Երևանի քաղաքապետարանի մամուլի պատասխանատու Հայկ Կոստանյանից փորձեց տեղեկանալ, թե ինչ խնդիրներ կան, որ ընկերություններն են մասնակցելու փառատոնին։ Կոստանյանը պատասխանեց, որ, որպես կանոն, մինչև վերջին օրն էլ մասնակիցները փոփոխվում են, և իրենք հստակ չեն կարող ասել, թե ովքեր կլինեն: Միայն պարզ է, որ փառատոնի համար Զաքյան փողոցը տրամադրվելու է անվճար հիմունքներով: Այսինքն՝ ծախսն ավելի քիչ է, քան կարելի էր պատկերացնել:
«Ժողովուրդ» օրաթերթը զրուցեց նաև նախկինում փառատոնին մասնակցած գարեջրի փոքր արտադրությունների ներկայացուցիչների հետ՝ ճշտելու, թե արդյոք պատրաստվում են այս տարի ևս մասնակցել: «Ալավերդի», «Կելլերս» և «Թովմաս» ընկերութուններից մեզ պատասխանեցին, որ այս տարի չեն պատրաստվում մասնակցել փառատոնին: Մի խոսքով, խուլ դժգոհություն է հասունանում՝ փառատոնին ընդառաջ»։
Մանրամասները թերթի այսօրվա համարում։
Լրահոս
Տեսանյութեր
Ինչո՞ւ հանկարծ ՀՀ իշխանությունները որոշեցին խլել արցախցիների կենսաթոշակային խնայողությունները
