Ձեր վստահելի աղբյուրը

Ուկրաինայի Գերագույն ռադան կոչ է արել Վրաստանի նախագահ Սալոմե Զուրաբիշվիլիին ներում շնորհել նախկին նախագահ Միխեիլ Սաակաշվիլուն: «ՌԻԱ նովոստի»-ն գրել է, որ, այդ մասին հայտարարել է պատգամավոր Յարոսլավ Ժելեզնյակը Telegram-ի իր ալիքում։

«Ռադան դիմել է Վրաստանի նախագահ Սալոմե Զուրաբիշվիլիին և ԵՄ անդամ երկրների խորհրդարաններին՝ հումանիտար ակտի իրականացման և Վրաստանի երրորդ նախագահ (2004-2013 թթ.)՝ Ուկրաինայի քաղաքացի Միխայիլ Նիկոլոզի Սաակաշվիլուն ներում շնորհելու անհրաժեշտության մասին»,-գրել է Ժելեզնյակը։

Ուկրաինայի խորհրդարանը Զուրաբիշվիլիին կոչ է արել Ուկրաինայի Գերագույն Ռադայի Մարդու իրավունքների հանձնակատարին մուտք գործել Սաակաշվիլու մոտ, ներում շնորհել Վրաստանի նախկին նախագահին ծանր ֆիզիկական վիճակի պատճառով։ Ռադան նաև կոչ է արել ԵՄ երկրների խորհրդարաններին համապատասխան որոշումներ ընդունել Սաակաշվիլուն ներում շնորհելու անհրաժեշտության վերաբերյալ։

Սաակաշվիլին ձերբակալվել է Վրաստանում 2021 թվականի հոկտեմբերի 1-ին, նրա նկատմամբ հետաքննվում են մի քանի քրեական գործեր։ Քաղաքական գործիչը հեռակա դատապարտվել է բանկիր Սանդրո Գիրգվլիանիի սպանության և պատգամավոր Վալերի Գելաշվիլիին ծեծի ենթարկելու գործերով։ Առաջին դեպքում Սաակաշվիլին դատապարտվել է երեք տարվա ազատազրկման, երկրորդում՝ վեց տարվա։ Բացի այդ, նա մեղադրյալ է 2007 թվականի նոյեմբերի 7-ի ընդդիմության հանրահավաքը ցրելու, «Իմեդի» հեռուստաընկերության ջարդերի, պետբյուջեի միջոցների յուրացման և ապօրինի սահմանը հատելու գործերով, վերջինս դեռ քննվում են դատարանների կողմից։ Վրաստանի վարչապետ Իրակլի Ղարիբաշվիլին հայտարարել է, որ Սաակաշվիլին դեռ երկար կմնա բանտում, նա կկրի ամբողջ ժամկետով պատիժը։