Ձեր վստահելի աղբյուրը

«Արցախի յոթ ամիս շարունակվող  ամբողջական շրջափակումը հասել է  օրհասկան կետի, երբ այլևս  լրջագույնս վտանգված է 120 հազար մարդու, այդ թվում 30 հազար երեխաների, 20 հազար տարեցների կյանքը, երբ  այլևս մի ողջ ժողովրդի գլխին կախված է գոյաբանական սպառնալիքներ, որոնք անհերքելի են ու  ընդգծված»,- Ստեփանակերտում Վերածննդի հրապարակում հանրահավաքում հայտարարեց Արցախի Հանրապետության Մարդու  իրավունքների պաշտպան Գեղամ Ստեփանյանը։

Նա նշեց, որ մեր  ժողովուրդը կանգնած է  թերսնուցման, սովի, Ադրբեջանի կողմից անթաքույց իրականացվող էթնիկ զտման, բռնի հպատակեցման ու ցեղասպանության  իրական ու անհերքելի սպառնալիքի ներքո։

«Դիմում եմ միջազգային հանրության բոլոր դերակատարներին։ Ասում եք մարու իրավունքներ։ Ուրեմն ասեք ինձ՝ ես ինչպե՞ս նայեմ այս ժողովրդի աչքերին ու ասեմ, որ իրենք էլ  ունեն իրավունքներ, ես ինչպե՞ս նայեմ թերսնուցման  մեջ գտնվող հղի կնոջ աչքերին, որի  երեխան կարող է արատներով ծնվել։

Ես ինչպե՞ս նայեմ այն մայրերի աչքերին, որոնց օրվա  ամենամեծ երազանքն  իրենց երեխայի համար մի բուռ միրգ կամ քաղցրավենքի հայթայթելն  է։ Ինչպե՞ս նայեմ   հերթերում կանգնած հազարավոր մարդկանց աչքերին, որոնք ժամերով հերթ են կանգնում մի  բուռ շաքարավազ կամ ձեթ ստանալու համար։

Ես ինչպե՞ս նայեմ 20 հազար  տարեցների աչքերին, որոնք օրվա  հանապազօրյա հացը  հայթայթելու համար անմարդկային  դժվարությունների  միջով են անցնում։

Ես ինչպե՞ս նայեմ այս հողակտորի համար ամենաթանկը տված զոհվածի մոր աչքերին, որն ահաբեկված հայացքով նայում է ինձ, վախենալով, որ կկորցնի իրեն մնացած վերջին սրբությունը՝ զավակի գերեզմանը։

Պատասխանեք ինձ։

Ուզում եմ,  որ դուք նայեք  նրանց աչքերին, դուք պատասխանեք նրանց, որովհետև ես այլևս պատասխաններ չեմ գտնում։

Գեղեցիկ ու շքեղ դահլիճներում մարդու իրավունքներից խոսելը մի բան է, այդ իրավունքների պաշտպանությանը գործնական քայլերով ապացուցելը մեկ այլ բան։

Մտահոգված ենք, խիստ մտահոգված են, խորապես մտահոգված ենք, կոչ ենք անում և անմանատիպ այլ հարտարարություններ...

Բավ է, հերիք է,  մինչ դուք  մերկապարանոց մտահոգություններ ենք հայտնում, 120 հազար մարդ մատնվում է  անմարդկային զրկանքների»,- ասաց Գ. Ստեփանյանը։

Նա դիմեց ռուս խաղաղապահներին, որոնց, նրա խոսքով,  2020 թվականի եռակողմ հայտարարությամբ վերապահվել է Արցախի ժողովրդի կյանքի իրավունքնի ու ֆիզիկական գոյություն հիմնական երաշխավորի դերը. «Մեզ խաղաղություն էր խոստացել։ Խաղաղությունը ամեն օր տեղեկագրերում հրադադարի  ռեժիմի խախտումների արձանագրումը չէ, խաղաղությունը ամենօրյա հաց հայթայթելով ֆիզիկական գոյություն քարշ տալը չէ, խաղաղությունը սեփական  հայրենիքում պատանդառված ու ամեն ինչից  զրկված լինելը չէ, խաղաղությունը ամեն օր հոգեբանական հարձակումների և մեր վրա թափվող անորոշությունները չեն։

Տեր կանգնեք  ձեր մանդատին՝ ապահովելու իրական խաղաղություն, բարեկեցիկ կյանք, որը խոստացել եք մեր ժողովրդին ամենաբարձր մակադակով»։

Գեղամ Ստեփանյանն Հայաստանում ու Սփյուռքում ապրողներին կոչ արեց մենակ չթողել Արցախում ապրող հայերին, կանգնել ի պաշտպանություն Արցախի։ 

«Սփյուռք՝ ձեզ խնդրում եմ, աղաչում եմ վեր ելեք կանխելու հայ ժողովրդի նոր ցեղասպանությունը, վեր ելեք պարտադրելու աշխարհին գոնե այս անգամ  պատասխանատվություն ստանձնելու հայ ճակատագրի համար։

Եթե աշխարհի շատ  ժողովուրդներին պետությունն ու պետականությունը մատուցվել է  սկուտեղի վրա, մենք վաստակել ենք  մեր ինքնորոշման իրավունքը. արցախյան բոլոր պատերազմներում  վճարված թանկ գինը,  յոթ ամսյա շրջափակման տառապանքները աղաղակող փաստեր են, որ մենք չենք կարող լինել Ադրբեջանի կազմում, չենք կարող ու վերջ։ Վերջապես հասկացենք։

Բոլոր նրանք, ովքեր դեռ  իլուզիաներ  ունեն այս առթիով թող պատասխանեն, արդյո՞ք հնարավոր էր պատկերացնել  հրաների կյանքը նացիստական Գերմանիայում։ Այո,  Ադրբեջանն այդ նույն նացիստական երկիրն է, որտեղ հասարակությունն ամբողջությամբ ներծծված է հայատյացությամբ, հայի նկատմամբ ատելությամբ ու թշնամանքով։ Բոլորը դրանում վաղուց արդեն պետք է համոզված լինեին։

Սա 21-րդ դարում իրականացվող ամենամեծ  ողբերգություններից մեկն է։ Ուրեմն վերջ տվեք խոսելուն, անհապաղ և կոնկրետ գործողություններ ձեռնարկելը ցպահանջ է Արցախում ողբերգությունը կանխելու համար։ Անտարբերությունը հավասարազոր է մեղսակցության, հիշեք՝ անպատիժ հանցագործությունը կրկնվող  հանցագործություն է։ Այսուհետ մեր անցյալը, ներկան ու ապագան նաև ձեր ձեռքերում է։

Արցախն ապրելու է, Արցախը հարատևելու է ի հեճուկս բոլոր չկամների ու թշնամիների և ի փառս համայն հայություն»,- ասաց Գեղամ Ստեփանյանը։