Ձեր վստահելի աղբյուրը

««Հայաքվեի» ոգևորությունն ամբողջ երկրով մեկ շարունակվում է, տարածվել է  Երևանից մարզեր, սահմանամերձ շրջաններ։ Ամենուրեք «Հայաքվեի» հետ կապված լուրջ հանրային դիսկուրս կա, որին միանում են  բազմաթիվ գործիչներ»,- ասուլիսում ասաց նախաձեռնության համակարգող Ավետիք Չալաբյանը։

Նա նշեց, որ «Հայաքվեն» դառնում է հանրային դիսկուրսի կենտրոնական կարևորագույն թեմաներից մեկը։

Ա. Չալաբյանն ընդգծեց, որ քաղաքացիների բարձր ակտիվությունը շարունակվում է, միանում են հանրության նոր շերտեր։

Նա հայտնեց, որ մարզերում 14 ստորագրահավաքի կետ ունեին անցած շաբաթ, այս շաբաթ արդեն 26 կետ, նաև կետեր կան Երևանի բոլոր վարչական շրջաններում, հաջորդ շաբաթ շարունակելու են ընդլայնել։

«Բնական, որ «Հայաքվեի» հաջողությունը պետք է առաջացներ հակազդեցություն։ Եթե նախորդ շաբաթ այդ հակազեդությունը հիմնականում հանրային դիսկուրսի միջոցով էր, շրջանառության մեջ  նետած կեղծ թեզերի տեսքով էր, որ «Հայաքվեն» պատերազմի է տանում, շատ շուտ ջարդվեց այդ թեզը, հասկանալի  դարձավ, որ պատերազմի հիմնական մեղավորը գործող իշխանությունն է, «Հայաքվեն»  չի կարող պատերազմի տանել, այն կայուն և արժանապատիվ  խաղաղությանը միտված նախաձեռնություն է, այս շաբաթ գործող  իշխանությունը տեսնելով, որ այդ թեզը, ըստ էության, չի կարողանում հաջողության հասնել և կանգնեցնել  «Հայաքվեի» միացողների հոսքը, անցավ գոտկատեղից ներքև տարբեր միջոցների»,- ասաց Չալաբյանը՝ հիշեցնելով, որ Մարտունիում և Հրազդանում «Հայաքվեի» ստորագրահավաքի կետերի վրա հարձակումների մասին։

«Տեղում խուլիգանական, կիսահանցագործ, հանցագործ տարրերը, որոնք  ակնհայտորեն ուղղորդվում են իշխանության տարբեր թևերի կողմից, հարձակումներ  գործեցին «Հայաքվեի» ստորագրահավաքի կետերի վրա, առանձին դեպքում հաջողվեց իրենց որոշ ժամանակով խափանել ստորագրահավաքը։

Կոշտ հակազդեցություն տեղի ունեցավ, իրավապահ համակարգն անմիջապես  մոբիլիզացվեց, նաև մեր աջակցիները տեղում  մոբիլիզացվեցին։ Բոլոր այն սադրիչները, որոնք փորձում էին այդպիսի ստոր միջոցներով խոչընդոտել «Հայաքվեն», արագ հակահարված ստացան ու հասկացան, որ իրենք պարզապես շանս չունեն։

Ուզում եմ մնացած պոտենցիալ սադրիչներին հիմա զգուշացնել՝ ձեր բախը մի փորձեք, ամեն տեղ օրենքի շրջանակներում կոշտ հակահարված ենք տալու։ Մենք ինքներս բացառապես գործում ենք օրենքի շրջանակներում»,- ասաց Չալաբյանը։

Նա նաև նշեց, որ թաղապետարանների մակարդակով բազմաթիվ ադմինիտսրատիվ խոչընդոտներ կան. «Այնպիսի տպավորություն է, որ բոլոր թաղապետարաններում, մասնավորապես նրանք, որտեղ ՔՊ-ի ներկայացուցիչներ են, վերևից հրահանգ են ստացել կեղծ անհիմն,  տարբեր տեսակ պատճառաբաններով խոչընդոտել մեր աշխատանքը։ Դրանց էլ ենք հակազդում»,- ասաց նախաձեռնության համակարգողը։

Հատկապես հեռավոր մարզերում՝ Տավուշում, Վայոց ձերում, նրա խոսքով, նաև մարդկանց որոշակի ահաբեկում է տեղի ունենում։

«Հավաքում են մարդկանց, մասնավորապես պետական ծառայողներին ու ասում, որ միանաք «Հայաքվեին», ձեզ աշխատանքից կազատենք։ Դա էլ արդյուքն չի ունենալու։

Վախի մթնոլորտը, որ ստեղծել են այս իշխանությունները, մեր աչքի առաջ ջարդվում է։ Հասարակությունն իրականում հոգնել է այդ  վախի մթնոլորտիվ, հակադրվում է  դրան ու տեսնում է «Հայաքվեն» որպես միջոց այդ վախի մթնոլորտը վերջնական ջարդելու ու մեր երկրում ազատ ժողովրդավարական կարգեր հաստատելու համար»,- ասաց Ա. Չալաբյանը։

Նա ընդգծեց, որ գործող իշխանությունը սարսափած է «Հայաքվեից». «Սարսափած է, քանի որ մենք բռնում ենք  ոչ միայն նրա՝ Արցախը հանձնող դավադիր ձեռքը, այլ սարսափած է, քանի որ  հասկանում է, որ «Հայաքվեն» բացարձակ ուղիղ ժողովրդավարության պրոցես է, մի բան, որը տրամաբանորեն կոտրում է իրենց  հիմնական թեզը, որ այս երկրում իրենք  ենք  ժողովրդավարություն ներկայացնում։ Ոչ, իրենք այս երկրում ներկայացնում են  պոպուլիստական դիկտատուրա,  ամբոխավարական դիկտատուրա։ Սարսափը նաև նրանում է,  որ ամբողջ գործընթացը տեղի է ունենում բացարձակ օրինական, խախտումներ չկան»,- ասաց Ավետիք Չալաբյանը։

Մանրամասն՝ տեսանյութում։