Ձեր վստահելի աղբյուրը

Այսօր տեղի է ունեցել  «Հանուն սոցիալական արդարության» կուսակցության համագումարը, որի ընթացքում կուսակցության նախագահ է վերընտրվել  Արման Ղուկասյանը: Քաղաքական ուժն ընտրել է նաև վարչության նոր կազմը: Կուսակցությունից հայտնում են, որ ի թիվս կուսակցաշինության և այլ հարցերի, ՀԱՍԱԿ-ը քննարկել է նաև Երևանի ավագանու առաջիկա ընտրություններին մասնակցության հարցը. որոշումը դրական էր:

Իր ելույթում կուսակցության վերընտրված նախագահ Արման Ղուկասյանը ներկայացրել է այն թեզերը, որոնց հիմքով կուսակցությունը որոշում է կայացրել մասնակցել առաջիկա ընտրություններին: Նա նշել է, որ մեր հայրենիքն ապրում է  շատ բարդ, ճակատագրական ժամանակահատված, որոնք չեն կարող չմտահգել իր երկիրը սիրող մարդկանց:

Կուսակցությունն ընդունել է հայտարարություն սեպտեմբերի 17-ին կայանալիք Երևանի ավագանու ընտրություններին մասնակցելու մասով: Ընտրվել է նաև կարգախոս՝ «Դու կարո՛ղ ես»:

«Մենք մեր համեստ ռեսուրսներով ու դիրքորոշմամբ կփորձենք համոզել երևանցիներին, որ չենք պատրաստվում ծառայել այս կամ այն քաղաքական ուժին կամ էլիտաներին: Մենք պատրաստ ենք ստանձնել պատասխանատվություն Երևանի ու երևանցիների ապագայի համար, և պատրաստ ենք մեր կամքը, մեր ձայնը պարտադրել: Միասին պայքարենք անարդարության դեմ»,- ասել է նա:

Քաղաքական ուժի ղեկավարը նշել է, որ այս ընթացքում տարբեր քննարկումներ է ունեցել մի շարք քաղաքական ուժերի հետ, սակայն որոշում է կայացվել մասնակցել միայնակ:

Կուսակցության փոխնախագահ Ծովինար Կոստանյանն իր ելույթում նշել է, որ կուսակցությունը պայքարել և պայքարելու է իրական փոփոխությունների ու բարեփոխումների համար, այլ ոչ թե դեկորատիվ փոփոխությունների:  Նա կարևորել է Երևանի դեմքը պահպանելու ծրագրերը, որոնք առանցքային են լինելու իրենց ուժի համար։

Նշենք, որ ՀԱՍԱԿ-ը ստեղծվել է 2016 թվականին: