Ձեր վստահելի աղբյուրը

«Արցախի Հանրապետության Անվտանգության խորհրդի նախկին քարտուղար, ԱՀ նախագահի նախկին գլխավոր խորհրդական գեներալ-մայոր Վիտալի Բալասանյանի շարունակում է մնալ հիվանդանոցում, երկուշաբթի օրը կկատարվեն անհրաժեշտ հետազոտություններ»,- Panorama.am-ի հետ զրույցում ասաց Վ.Բալասանյանի  պաշտան Ռաֆայել Մարտիրոսյանը։

Նա հայտնեց, որ նախորդ օրը Վ.Բալասանյանի վիճակը վատ էր, բժիշկների միջամտության արդյունքում մի քիչ կայունացել է. «Դեռևս անհնար է լիարժեք գնահատական տալ, քանի  որ  պետք է կարանոգրաֆիա անցնի, սիրտը հետազոտվի, դրանից հետո նոր հնարավոր է հիմնավոր եզրակացություն տալ առողջական վիճակի մասին»։

Հիշեցնենք, որ Վիտալի Բալասանյանը ձերբակալվել է հուլիսի 13-ի երեկոյան ԱՀ Քրեական օրենսգրքի 337 հոդվածի 1-ին մասով հանցանք  կատարելու կասկածանքով ( իշխանության ներկայացուցչի նկատմամբ բռնության գործադրում): Վիտալի Բալասանյանի՝ ձերբակալված որդին, եղբայրը, քեռորդին արդեն ազատ են արձակվել։

Առաջին ատյանի դատարանը մերժել էր Վիտալի Բալասանյանի ձերբակալման իրավաչափության վերաբերյալ բողոքը։ Ռ.Մարտիրոսյանն ասաց, որ արդեն վերաքննիչ դատարան բողոք է ներկայացրել։

«Անկախ նրանից, ձերբակալության ժամկետը լրանում է, թե ոչ, մեզ համար դա էական նշանակության ունեցող հանգամանք է»,- ընդգծեց պաշտպանը։

Նա նաև հայտնեց, որ դեռևս Վ.Բալասանյանին կալանավորելու միջնորդություն ներկայացված չէ։ Ձերբակալության ժամկետը լրանում է հուլիսի 16-ին ժամը 22։00-ից հետո։

«Դեռևս ներկայացված չէ կալանքի միջնորդությունը։ Եթե մինչ նախատեսված ժամկետը չներկայացվի, պարոն Բալասանյանն ազատ կարձակվի»,- ասաց պաշտպանը։

Նա կարծում է, որ եթե բոլոր կողմերին հարցաքննեն, նման միջնորդություն չի էլ ներկայացվի։

«Որքան տեղեկացված եմ, հարցաքննվել են ի թիվս ձերբակալվածները, ԱԱԾ աշխատակիցները։ Այնտեղ գտնվել են անկողմնակալ անձինք, նրանց ցուցմունքն արժանահավատության տեսակետից ավելի էական նշանակություն ունեցող հանգամանք է, որպեսզի վարույթ իրականացնող մարմինը կարողանա ճիշտ որոշում կայացնել»,- ասաց պաշտպան Ռ.Մարտիրոսյանը։