Ձեր վստահելի աղբյուրը

Ռուսաստանը միշտ հարգել է Ադրբեջանի տարածքային ամբողջականությունը, սակայն դա չի չեղարկում Ղարաբաղում իրավիճակը խաղաղ ճանապարհով լուծելու անհրաժեշտությունը:«ՌԻԱ Նովոստին»  մեջբերում է արել  ՌԴ ԱԳՆ-ի տարածած հաղորդագրությունից։

Ավելի վաղ Ադրբեջանի ԱԳՆ-ն նշել էր, որ Ռուսաստանի դիվանագիտական գերատեսչության հուլիսի 15-ի հայտարարությունը Լեռնային Ղարաբաղում իրավիճակի վերաբերյալ չի համապատասխանում դաշնակցային համագործակցության մասին երկկողմ հռչակագրին։

«Հուլիսի 15-ի ՌԴ ԱԳՆ հայտարարության վերաբերյալ Ադրբեջանի ԱԳՆ ոչ կոռեկտ մեկնաբանությունների կապակցությամբ ընդգծվում է, որ Ռուսաստանի Դաշնությունը միշտ հարգանքով է վերաբերվել Ադրբեջանի տարածքային ամբողջականությանը»,-հայտնում են ՌԴ ԱԳՆ-ից ԱԳ փոխնախարար Անդրեյ Ռուդենկոյի և Մոսկվայում Ադրբեջանի դեսպան Փոլադ Բյուլբյուլօղլուի հանդիպման արդյունքներով։

ՌԴ ԱԳՆ-ն նաև նշել է, որ Մոսկվան «ամբողջովին հավատարիմ է «Դաշնակցային փոխգործակցության մասին» երկկողմ հռչակագրի ոգուն և տառին։

«Միևնույն ժամանակ, այն չի չեղարկում հայ-ադրբեջանական հարաբերությունների կարգավորման գործընթացը համակողմանիորեն խթանելու, օրակարգային բոլոր հարցերը, այդ թվում՝ Լեռնային Ղարաբաղի բնակչության իրավունքների և անվտանգության ապահովումը, բացառապես խաղաղ քաղաքական և դիվանագիտական ճանապարհով լուծելու խնդիրը»,-ընդգծել են ՌԴ ԱԳՆ-ում։

Բացի այդ, ռուսական կողմը հաստատել է իր պատրաստակամությունը մոտ ապագայում կազմակերպել արտգործնախարարների եռակողմ հանդիպում Մոսկվայում, այդ թվում՝ համաձայնեցնելու խաղաղության պայմանագիրը, «հետագայում Ռուսաստանի, Ադրբեջանի և Հայաստանի ղեկավարների Մոսկվայում հանդիպման վր դրուս գալով, ։ ստորագրել նշված փաստաթուղթը»։