Ձեր վստահելի աղբյուրը

«Ինչպես Արցախում շարունակվում է համազգային շարժումը, այնպես էլ մենք պետք է Հայաստանում շարունակենք հավաքները միջազգային կառույցների և միջնորդ պետությունների ներկայացուցչությունների մոտ՝ պահանջելով մեզ ընդունել, գործել, լսել»,-Կարմիր խաչի միջազգային կոմիտեի գրասենյակի դիմաց կազմակերպած ակցիայի ժամանակ ասաց Արցախի պետական համալսարանի դասախոս Լիանա Ավանեսյանը, որն արտասահմանում կրթություն ստանալու նպատակով դուրս էր եկել Արցախից և հիմա չի կարողանում վերադառնալ:

Նա հայտնեց, որ բոլոր միջնորդները և իրավասու միջազգային մարմինները պետք է գործեն, քանի որ Արցախում հումանիտար ճգնաժամը բարդացել է:

«Եթե ուզում են կանխել արդեն նշմարվող ցեղասպանությունը, ապա այդ կառույցները պետք է գործեն իրենց լիազորությունների մեջ և, ինչու ոչ, դրանից դուրս , քանի որ իրավիճակն աղետալի է:

Քանի որ մեր բոլորի ընտանիքներն Արցախում են, այդ կառույցներին առաջարկել ենք մեր աջակցությունը՝ Արցախում իրավիճակի վերաբերյալ տեղեկատվություն տրամադրելու հարցում»,-ասաց Ավանեսյանը:

Նա հայտնեց, որ նամակը ներկայացրել են Կարմի խաչի միջազգային կոմիտեին և սպասում են ավելի գործուն քայլերի՝ չնայած գիտեն, որ կոմիտեի լիազորությունները շատ սահմանափակ է:

«Հասկանալով նրանց լիազորությունների շրջանակի սահմանափակությունը՝ փորձում ենք այդ կառույցներին մղել ավելի ակտիվ գործողությունների»,-ասաց Լիանա Ավանեսյանը: