Ձեր վստահելի աղբյուրը

ՀՀ վերաքննիչ քրեական դատարանի դատավոր Վազգեն Ռշտունի մտահոգիչ է համարում, որ Բարձրագույն դատական խորհրդի անդամի ընտրության համար քվեաթերթիկում ներառելու ծանուցումը միայն մարզերի առաջին ատյանի ընդհանուր իրավասության դատարանների դատավորներին է ուղարկվել։

«Այդ հարցը կփորձենք քննարկել ու ընդհանուր լուծում ստանալ Դատավորների ընդհանուր ժողովում։ Իմ գնահատմամբ,  առնվազն գոնե Երևան քաղաքի դատավորները պետք է ծանուցվեին այդ մասին»,- Դատավորների ընդհանուր ժողովից առաջ լրագրողների հետ զրույցում ասաց դատավորը։

Հարցին, այն դատավորները, որոնք ընդդիմանում են, նրանց  լիազորությունները դադարեցնում են, մտավախություն չունի՞, որ նույն իրավիճակը  նաև կարող է «իր դուռը թակել», դատավորն ասաց. «Անկեղծ ասած, պետք է մի քիչ մտավոր հետամտաց լինես, որ այդ մտավախությունը չունենաս»։

Ըստ նրա, ինչ-որ տենդենց է գնում, որ ուզում են ցույց տալ, որ Բարձրագույն  դատական խորհրդին քննադատել չի կարելի, բացասական կարծիք չի կարելի հայտնել։

«Հիմա հարց է առաջանում՝ եթե գովել կարելի է, քննադատել ինչու՞ չի կարելի։ Ի վերջո, այդ դատարանը, որը ԲԴԽ-ն երբեմն հանդես է գալիս, դա մեզ համար է, դատավորներիս համար է, որ մեր դատավարություններն ընթանան արդար, և ոչ թե ԲԴԽ-ի ու ԲԴԽ անդամների համար, որ իրենք այդ անվան տակ ոչ մի քննադատական խոսք չասվի։

Ի վերջո, ԲԴԽ-ն սրբավայր չէ, և այնտեղ աշխատողներն էլ սուրբ չեն, միգուցե լինեն մեջները սուրբ մարդիկ, ամեն դեպքում մենք իրենց այդպես չենք ընկալում, մենք ընկալում ենք նրանց  որպես ԲԴԽ անդամներ։ Իսկ ո՞վ է գնահատական տալու, ի վերջո, ԲԴԽ գործունեությանը, ո՞ւմ են իրենք հաշվետու։ Ըստ իս, ինչպես ԱԺ-ն իրենց ընտրողներին է հաշվետու, իրենք էլ մեզ՝ դատավորներիս են հաշվետու։ Եթե մենք տեսնում ենք թերացումներ, դժգոհություններ, եթե անգամ մեր դժգոհություններն արդարացված չեն, ո՞ւմ արտահայտենք»։