Ձեր վստահելի աղբյուրը

Արցախյան երրորդ պատերազմից ժամանակ տեղահանված և Հայաստանում ապաստան գտած մի խումբ արցախցիներ կրկին ՄԱԿ-ի գրասենյակի մոտ են ու կրկին նույն պահանջով՝ բացել կյանքի ճանապարհը, որն արդեն 7 ամսից ավելի ապօրինի փակ է Ադրբեջանի կողմից, քաղաքացիների կողմից հավաքված պարենն ինչ –որ ճանապարհով հասցնել արցախահայերին, որոնք սովի են մատնված։

ՀՀ Մարդու իրավունքների առաջին պաշտպան Լարիսա Ալավերդյանն իր  աջակցությունն ու զորակցությունը հայտենց ողջ արցախահայությանը, որն  այսօր  պահպանում ու պաշտպանում է  համայն հայության պատիվն ու արժանապատվությունը։

«Թող բոլորն իմանան՝ նրանք, ովքեր սովի են մատնված ոչ միայն Ադրբեջանի կողմից, այլ լուռ ու մունջ նայող միջազգային հանրության բոլոր ինստիտուտների կողմից, այնտեղ է մարդու իրավունքների ու արժանապատավության ուղղակի մարմնավորումը, այդ մարդիկ իրենց կյանքով, զրկանքներով ապացուցում են, որ ոչինչ չկա ավելի բարձր, քան մարդու արժանապատվությունը, որն այդքան մեծ ոգևորությամբ ուզում են նսեմացնել նախ և առաջ եվրոպական չինովնիկները։

Դիմելով ձեզ ունենք միայն մեկ խնդրանք՝ ապահովեք կամ հողային կամ օդային ճանապարհը։ Մենք ձեզանից սնունդ չենք ուզում, մենք ինքներս ենք բերելու սնունդը, պահանջում ենք ապահովել ճանապարհը։ Ամոթ է, դուք սովի եք մատնում 120 հազար հայերի, այդ թվում 30 հազար մանուկներին։

Ո՞ր մեկդ է հավատում, որ դուք ուզում եք բացել ճանապարհը ու չեք կարողանում։ Ինչի՞ համար են ձեր այդ գրասենյակներն ամեն երկրում։ Դուք  կարողանում եք, չեք անում․ Պահանջում ենք՝ բացեք կյանքի ճանապարհը կամ  փակեք ձեր գրասենյակը»,- Լարիսա Ալավերդյանն իր կոչն ուղղեց ՄԱԿ-ի հայաստանյան գրասենյակի աշխատակիցներին։

«Բացեք կյանքի ճանապարհը, իմ ընկերները քաղցած են»,- դիմեց միջազգային հանրությանն արցախցի փոքրիկը։

«Բացեք կյանքի ճանապարհը։ Ամոթ ՄԱԿ-ին, ամոթ, ամոթ»՝ վանկարկում են ակցիայի մասնակիցները։