Ձեր վստահելի աղբյուրը

Այսօր  ԿԳՄՍ նախարար, Մատենադարանի հոգաբարձուների խորհրդի նախագահ Ժաննա Անդրեասյանը Մատենադարանի աշխատակիցներին ներկայացրել է նորընտիր տնօրեն Արայիկ Խզմալյանին։
Նախարարը ողջունել է ներկաներին և շնորհակալություն հայտնել Մատենադարանի տնօրենի ժամանակավոր պաշտոնակատար Կարեն Մաթևոսյանին։

Շնորհավորելով Արայիկ Խզմալյանին՝ Ժաննա Անդրեասյանը նշել է, որ նորընտիր տնօրենի զարգացման ծրագիրը մեծապես նպաստելու է Մատենադարանի զարգացմանը։ Նախարարը վստահեցրել է, որ Արայիկ Խզմալյանն օժտված է կառավարչական անհրաժեշտ հմտություններով, կարողություններով ու փորձառությամբ այս բազմաշերտ կառույցի ղեկավարման համար։

Նա շեշտել է. «Մատենադարանը եզակի նշանակություն ունեցող հաստատություն է պետության համար, և բոլորս կրում ենք պարտավորություն և պատասխանատվություն նրա զարգացման և միջազգային հեղինակության ամրապնդման համար»։

Արայիկ Խզմալյանը շնորհակալություն է հայտնել ՀՀ ԿԳՄՍ նախարար, Մատենադարանի հոգաբարձուների խորհրդի նախագահ Ժաննա Անդրեասյանին պարտավորեցնող խոսքերի ու վստահության համար։

«Մեզ անհրաժեշտ են ռազմավարական ծրագրեր, որպեսզի դիամակայենք մեր առջև ծառացած մարտահրավերներին։ Մատենադարանը պետք է լինի առաջամարտիկ ընթացող տեղեկատվական պատերազմում», - շեշտել է Արայիկ Խզմալյանը։

Նա նշել է, որ գիտականությունը պետք է գերակայի Մատենադարանի գործունեության բոլոր ոլորտներում։ Շնորհակալություն հայտնելով ներկաներին՝ նորընտիր տնօրենը վստահեցրել է, որ յուրաքանչյուր մատենադարանցի ներգրավված է լինելու հաստատության զարգացման ծրագրի իրականացման աշխատանքներում: