Անմահ հերոսներին, ովքեր զոհեցին իրենց կյանքը, որպեսզի նոր կյանքեր ծնվեն և հավերժի Հայրենիքը

Հասարակություն 14:17 21/07/2023 Արցախ

Անմահ հերոսներին, ովքեր զոհեցին իրենց կյանքը, որպեսզի նոր կյանքեր ծնվեն և հավերժի Հայրենիքը

Երևանի «Ոսկան Երևանցի» տպագրատանը լույս է տեսել արցախցի լուսանկարիչ Դավիթ Ղահրամանյանի «Արցախ։ Անավարտ պատերազմ» եռալեզու (հայերեն, անգլերեն, ռուսերեն) գիրք-ալբոմը։

Դավիթը գրում է գրքի պատմությունը. «Երբ ընթանում էր պատերազմը, այդ ժամանակ չգիտեինք, որ այն կտևի 44 օր, որ կկորցնենք հազարավոր մեր եղբայրներին, հայրերին, ընկերներին, հայրենիքի մեծ մասը... Hermine Avagyanն գրում էր ինձ, ասում էր.

-Դավիթ, ամեն ինչ ավարտվի ցուցահանդես պիտի անենք:

Ինքս էլ մեծ ցանկություն ու հավատ ունեի, որ ցուցահանդես եմ կազմակերպելու, որտեղ ամեն մի լուսանկար թեկուզ ցավի միջով, բայց կպատմի հաղթանակի մասին։

Պատերազմի ցավոտ ավարտից հետո արտասահմանյան, նաև տեղի ֆոտոլրագրողները վավերագրում էին մեր հայրենակիցների գաղթը, վառվող տները... ես չէի լուսանկարում... դա իմ ցավն էր, իմ հողն էր։ Կարող եք դա ընդունել որպես թուլություն, բայց շատ դժվար է սեղմել տեսախցիկի կոճակը, երբ քո ցավն ես լուսանկարում։

Անցավ ժամանակ... հավաքվեցի, կողմնորոշվեցի: Հասկացա, որ պարտավոր եմ շարունակել լուսանկարել... որովհետև պատերազմը չէր ավարտվել...

Արդյունքում լույս տեսավ իմ և Հերմինեի երկար սպասված պատկերագիքրը, որը պատմում է 2020թ. ի 44 օրյա պատերազմից մինչև Ադրբեջանի կողմից Արցախի 120.000 ժողովրդի շրջափակումը, որը միջազգային հանրության կարևոր դերակատարների կողմից ընդամենը կոչերով դատապարտող հայտարարությունների ֆոնին շարունակվում է արդեն 7 ամիս և վեր է ածվել հումանիտար լուրջ աղետի։

Հույս ունեմ, որ այս պատկերագիքրը գոնե չնչին չափով լույս կսփռի այն իրականության վրա, որում այսօր ապրում և մաքառում է արցախցին։ Իսկ արցախցին ավել բան չի ուզում, ընդամենը ազատ և անվտանգ ապրել իր հայրենի հողում։

ԵՎ վերջում ուզում եմ հատուկ շնորհակալություն հայտնել Համազգային Հայ կրթական եւ մշակութային միությանը՝ Hamazkayin Central աշխարհի տարբեր անկյուններում իր հայրենանվեր գործունեության համար։

Hamazgayin Artsakh office ին, ի դեմս տնօրեն Hermine Avagyanի, ով բոլոր հնարավոր և անհնարին միջոցներով կանգնած է Արցախի երիտասարդության կողքին և իրականացնում է տարբեր կրթական և մշակութային ծրագրեր, ով նաև հանդիսանում է պատկերագրքում տեղ գտած տեքստերի հեղինակը։

Zareh Shirvanian ին՝ գրքի ճաշակով ձևավորման համար։

Genesis Armenia - Ջենեսիս Արմենիա ին՝ գրքի անգլերեն թարգմանության համար։

Лиана Багдасарян ին՝ գրքի ռուսերեն թարգմանության համար։

Արևիկ Գաբրիելյանին՝ գրքի խմբագրման համար։

Արցախի Մարդու իրավունքների պաշտպան / Artsakh Ombudsman ին՝ գրքում որպես մուտքի խոսք ներկայացնելու համար վերջին երեք տարիների ընթացքում Ադրբեջանի կողմից Արցախում ապրող մարդկանց իրավունքների վոտնահարման մասին համառոտ նկարագիրը։

Եվ ամենամեծ շնորհակալությունն եմ ոզում հայտնել բոլոր այն մարդկանց, ովքեր չեն լռում՝ լինի դա Արցախում կամ Արցախից դուրս, ովքեր հնարավոր բոլոր միջոցներով կանգնած են Հայրենիքի կողքին և գիտակցում են, թէ ինչ կնշանակակի Արցախի վերջնական կորուստը Հայրենիքի համար։

Պատկերագիրքը նվիրվում է բոլոր այն անմահ հերոսներին, ովքեր զոհեցին իրենց կյանքը, որպեսզի նոր կյանքեր ծնվեն և հավերժի Հայրենիքը»։

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: