Ձեր վստահելի աղբյուրը

Հադրութից կանանց թույլ չտվեցին Հաքարի կամրջով անցնել և միավորվել իրենց ընտանիքներին։ Panorama.am-ի լրագրողի հաղորդմամբ, «Վերադարձ դեպի Դիզակ» ՀԿ նախագահ Մարգարիտա Քարամյանը հայտարարեց, թե աշխարհին ուզում են ցույց տալ, որ Ադրբեջանը ստում է՝ ասելով, թե Լաչինի միջանցքը բաց է։ Նա տեղեկացրեց, որ ինքը Հադրութից է և չի կարողանում գնալ Արցախ իր թոռներին տեսնելու, որոնցից բաժանված է արդեն 7 ամիս։ Քարամյանը հայկական ուղեկալի դիմացից զանգահարեց Արցախում ռուսական խաղաղապահ զորակազմի շտաբ, որպեսզի խաղաղապահների ներկայացուցիչները գան իրենց դիմավորեն և  ուղեկցեն Հաքարի կամրջով դեպի Արցախ, սակայն հեռախոսազանգերին չպատասխանեցին։

Մարգարիտա Քարամյանը հայտարարեց, որ հերթական անգամ ապացուցվեց, որ Լաչինի միջանցքը փակ է, և կեղծիք է ադրբեջանական հայտարարությունները, թե միջանցքը բաց է։ Նա հայտնեց, որ հերթական անգամ իրեն չհաջողվեց միավորվել Արցախում գտնվող իր հարազատների հետ։

Մարգարիտա Քարամյանի հետ միասին, Արցախ էր ուզում գնալ նաև Արևիկ Համբարձումյանը, որի Հադրութից բռնագաղթած մեծ ընտանիքը  նույնպես Ստեփանակերտում են։