Ձեր վստահելի աղբյուրը

«Անցած շաբաթ մենք ընդարձակել ենք «Հայաքվեի» աշխարհագրությունը։ Մարզերում՝ 32 համայնքում, տեղի է ունենում ստորագրահավաք»,- ասուլիսում հայտարարեց «Հայաքվեի» նախաձեռնության համակարգող Ավետիք Չալաբյանը։

Նա նշեց, որ գյուղերում երբեմն ակտիվությունն ավելի ուժեղ է, քան քաղաքներում։

«Բնականաբար, իշխանությունը շարունակում է իր հակազդեցությունը, ընդ որում՝ նաև ապօրինի միջոցներով։ Եթե անցած շաբաթ դրանք բացահայտ սադրանքներն էին, այս շաբաթ հիմնականում եղել է ահաբեկման տեսքով։ Հանրային ծառայողներին ահաբեկում են, որ չմասնակցեն ստորագրահավաքին, ստորագրությունները հետ վերցնեն։

Դեպք ունենք, երբ չորս հանրային ծառայող եկել և խնդրել են, որպեսզի իրենց ստորագրությունները հետ վերցնեն, որովհետև իրենց սպառնում են աշխատանքից ազատել։ Դեպքն արձանագրված է, ամենայն հավանականությամբ, ընթացք կտանք, որպեսզի կանխենք նման դեպքերը։  Քաղաքացիների իրավունքի ցանկացած այդպիսի սահմանափակում պատժվում է Քրեական օրենսգրքի 210-րդ հոդվածով, որը նախատեսում է 3-6 տարի ազատազրկում։

Կոչ եմ անում բոլոր քաղաքացիներին, մասնավորապես հանրային ծառայողներին, եթե ձեր ղեկավարը փորձի ահաբեկել «Հայաքվեին» մասնակցելու համար, ձայնագրեք նրա խոսքը, տրամադրեք մեզ, հաղորդում կտանք հանցագործության մասին»,- ասաց Ա. Չալաբյանը։

Նրա խոսքով, այդ ամեն ինչը տեղի է ունենում մի պարզ պատճառով, իշխանությունը սարսափած է «Հայաքվեի» թափ հավաքող ընթացքից։