«Առնո Բաբաջանյան» համերգասրահում կանցկացվի «Ժամանակների կապը» երիտասարդ խորեոգրաֆների երեկոն

Մշակույթ 12:45 22/07/2023 Հայաստան

Հուլիսի 24-ին, ժամը 19:00 «Առնո Բաբաջանյան» համերգասրահում Երևանի Թատրոնի և կինոյի պետական իստիտուտը և «Բալետ 2021» հիմնադրամը համատեղ կներկայացնեն «Ժամանակների կապը» երիտասարդ խորեոգրաֆների երեկոն:

«Ժամանակների կապը» երիտասարդ խորեոգրաֆների երեկոն «Բալետ 2021» զարգացման հիմնադրամի գեղարվեստական ղեկավար և հիմնադիր, Երևանի թատրոնի և կինոյի պետական ինստիտուտի խորեոգրաֆիայի ամբիոնի դասախոս, ՀՀ ժողովրդական արտիստ՝ Ռուդոլֆ Խառատյանի նախաձեռնությունն է:

«Պարարվեստի զարգացման հիմնախնդիրներից է ոչ միայն ավանդույթների պահպանումը, այլ նաև միջավայր ստեղծել՝ զարգացնելու պարարվեստը որպես ժամանակակից արտահայտման ձև ու ձևավորել հայկական խորեոգրաֆիկ մտքի ուրույն դիմապատկերը:
Բալետային արվեստում բեմադրական մտքի զարգացման, ձևավորման և կայացման երաշխավորը խորեոգրաֆն է՝ իր գաղափարներով և էմոցիոնալ շարքով:

Երիտասարդ խորեոգրաֆների երեկոն նպատակն է պարի ռեժիսուրա ուսումնական ծրագրի ուսանողների համար պայմաններ ստեղծել ինքնուրույն բեմադրություններ իրականացնել՝ իրենց մեջ բացահայտելու ստեղծագործական ջիղը և փորձեր կատարելու ձևավորել ու պարի միջոցով փոխանցել իրենց բնորոշ ուրույն ոգին և խառնվածքը՝ ընդլայնելու հայկական մտածողության հորիզոնները:

Ծրագիրը կնպաստի ձևավորելու հաջորդ սերնդի խորեոգրաֆներ, որոնք կապահովեն հայկական մտքի և գաղափարների արտացոլումը բալետում և առանձնահատուկ խորեոգրաֆիկ մտքի դիմապատկերով կդառնան համաշխարհային բալետային ընտանիքի լիիրավ անդամ»,- նշում են կազմակերպիչները։

Երեկոն հիմնված է Արամ Սաթյանի երաժշտության վրա: Բեմանկարիչ՝ Արեգ Միրիջանյան:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: