Ձեր վստահելի աղբյուրը

Արցախի  Հանրապետության նախագահ Արայիկ Հարությունյանը հայտարարել է, որ Ղարաբաղը (Արցախի Հանրապետություն. խմբ) շարունակելու է ինքնորոշման hամար պայքարն ու կոչ է արել Հայաստանի իշխանություններին զգույշ լինել Ադրբեջանի տարածքային ամբողջականության ճանաչման հարցով իրենց հայտարարություններում։ Այս մասին գրել է «Ինտերֆաքսը»։

«Ոչ մի երկիր չի կարող մեզ զրկել ինքնորոշման իրավունքից։ Ես կոչ եմ անում Հայաստանի իշխանություններին ավելի զգույշ լինել իրենց հայտարարություններում։ Ինքնորոշման իրավունքը միջազգային նորմ է, մեր իրավունքը, որից մենք օգտվում  ենք նաև այսօր»,- ասել է Հարությունյանը երկուշաբթի օրը կայացած մամուլի ասուլիսում՝ պատասխանելով Ինտերֆաքսի հարցին։

Նա նշել է, որ անկախ որևէ հայտարարությունից, «Լեռնային Ղարաբաղը կշարունակի պայքարն ինքնորոշման համար»։

Հարությունյանն ասել է, որ պատրաստ է Բաքվի հետ երկխոսության, որը «պետք է նաև հաշվի առնի մեր իրավունքներն ու վարվի հավասարության սկզբունքով»։

ԱՀ նախագահն նշել է, որ Լաչինի միջանցքը, որը կապում է «Լեռնային Ղարաբաղը Հայաստանի հետ», պետք է ապաշրջափակվի՝ հումանիտար աղետի կանխման, սննդամթերքի տեղափոխման համար, միաժամանակ դեմ է արտահայտվել Բաքվից Բարդա-Ակնա ճանապարհով մթերք մատակարարելու Ադրբեջանի առաջարկին։

Նա նշել է, որ «Լեռնային Ղարաբաղում տեղակայված ՌԴ խաղաղապահները նույնպես դժվարություններ ունեն պարենով ապահովելու հարցում, և նրանք նույնպես «օգտվում են սննդի մեր սուղ պաշարներից»։