Ձեր վստահելի աղբյուրը

Նիկոլ Փաշինյանն ասուլիսի ընթացքում հարց է հնչեցնում՝ արդյո՞ք ԵԱՀԿ Մինսկի խմբի համանախագահ որևէ երկիր եղել է, որ Լեռնային Ղարաբաղը չի ճանաչել որպես Ադրբեջանի մաս:

«Չի եղել այդպիսի երկիր»,- ասաց նա։

Նիկոլ Փաշինյանը փաստաթուղթեր է բերել իր հետ, որոնցից մեջբերումներ արեց.
«ԵԱՀԿ ՄԽ համանախագահ Ստեֆան Վինսկոտի հանդիպման արձանագրումն է  Ֆրանսիայի սենատի արտաքին գործերի, պաշտպանության և զինված ուժերի հարցերով հանձնաժողովում։ Սա տեղի է ունեցել 2020 թվականի հունվարի 8-ին։ Համանախագահը նշել է՝ «Լեռնային Ղարաբաղն Ադրբեջանում գտնվող լեռնային անկլավ է»: 2012-2016 թթ., 2017-2019թթ.  ԱՄՆ դեպարտամենտի մարդու իրավունքների տարեկան զեկույցում հիշատակված ձևակերպումները մեջբերեմ. «Անջատողականները, Հայաստանի աջակցությամբ, շարունակել են  վերահսկել Լեռնային Ղարաբաղի մեծ մասը ու 7 այլ ադրբեջանական տարածքներ»: Հիմա սա ես չեմ ստեղծել, սա եղել է»։

Նիկոլ Փաշինյանը նշեց, որ  Մոսկվայի դիրքորոշման մեջ էլ կան, իհարկե, շատ ազնիվ շեշտադրումներ:

«Այդ շեշտադրումներից շատերը, որ թարգմանենք դիվանագիտական լեզվից, այսպես է հնչում՝ լավ, դուք 30 տարի անկախ պետություն եք, ինչքա՞ն պետք է ինչ պրոբլեմ լինի, զանգեք Մոսկվա կամ նամակ գրեք Մոսկվա: Մինչև ե՞րբ ենք ապրելու «նամակ ռուսաց թագավորին» ժանրի մեջ: Ընդ որում, Լեռնային Ղարաբաղի (Արցախի Հանրապետություն-խմբ.) մեր հայրենակիցներն այդ ժանրի հիմնադրման գործում շատ էական դերակատարում ունեն և ոչ միայն։

Լավ, այսօր չե՞նք տեսնում, թե ի՞նչ խնդիրներ ունի Մոսկվա, բա Մոսկվայի խնդիրներն ո՞վ լուծի։ Բոլորն էլ խնդիրներ ունեն»,- ասաց նա:

Ըստ Փաշինյանի,  որպես անկախ պետություն, Հայաստանը  պետք է անի հասունացման հաջորդ քայլը՝ հասկանալով, որ խնդիրների լուծողը առաջին հերթին մենք ենք:

«Դա է պատճառը, որ ես համաձայնել եմ պայմանավորվածությանը, որ Հայաստանն ու Ադրբեջանը փոխադարձաբար ճանաչում են միմյանց՝  29 հազար 800 քառակուսի կիլոմետր  և 86 հազար 600 քառակուսի կիլոմետր տարածքային ամբողջականությունը: Կարծում եմ, այս ուղղությամբ զարգացումը, որն, ի միջիայլոց, չի երաշխավորում հաջողություն, Հայաստանի համար հասունացման հաջորդ աստիճան մտնելու շատ կարևոր քայլ է»,- ասաց Նիկոլ Փաշինյանը: