Ձեր վստահելի աղբյուրը

«Եթե ձեզ թվում է, որ ձեր աղջկա հետ  կարողանում եք գնալ Ռուսաստան ու դա ցույց տալ մեզ, մեր երեխաները դրանից վատ են զգալու, ոչ մի դեպքում, դա ծիծաղալու է։ Իսկ ես գիտեմ, որ դուք դա  միտումնավոր եք անում։ Կամ ձեր կինը, որ ձեր ուտելիքն է  ի ցույց դնում։ Ով չգիտի, թե ինչ է ուզում դրանով ասած լինել։ Առնվազն  ծիծաղելու է։ Այո, այսօր Արցախում հացի խնդիր կա, երեխաները ժամերով հացի հերթ են կանգնում։ Ձեր կնոջ նկարած բերք ու բարիքն այստեղ գրեթե չկա։ Բայց մենք գիտենք հանուն ինչի ենք մեր Արցախում, մենք հայ եղել ենք, կանք ու պայքարելու ենք մեր հողի համար։

Հա, մահվան կռիվ ենք տալիս, բայց գիտենք՝ հանուն ինչի ենք տալիս։ Ու գիտենք նաև՝ ով է մեզ հասցրել այս օրի, ուղղակի  մի բան մոռանում եք, որ մեր կողը հաստ է,  հասկանում ենք, որ ուզում եք կոտրած լինել, բայց չի հաջողվելու։ Ամենակարևոր հարցը՝ ոչ թե հարց, այլ ասում եմ, իմացեք՝ ես որպես Արցախի քաղաքացի ու ինձ նման շատերը. ձեզ չեն տվել այդ լիազորությունը Արցախը ճանաչել Ադրբեջանի կազմում»,- սա արցախցիներից մեկի դիտարկում-հարցն է Նիկոլ Փաշինյանին, որը  ասուլիսի ընթացքում հնչեցվեց  լրագրողներից մեկի հեռախոսով։

Փաշինյանն արձագանքեց. «Երբ կինս պատերազմի օրերին Ստեփանակերտում էր, այդ օրերին Ստեփանակերտում  շատ քիչ ոչ միայն կին, նաև տղամարդ կար։

Հաջորդ հարցը. կինս ուտելիք է ցույց տվել։ Էդ ի՞նչ է ցույց տվել. լոլիկ, բամիա, սմբուկ մեր բակում աճած։ Հիմա ինչ–որ մեկն ուզում է ասի, որ հուլիս ամսին Ղարաբաղում բադրիջան, լոլիկ, բամիա չկա՞, իսկ ինչի՞ չկա։

Պետք է այդ ամեն ինչը լինի, ինչո՞ւ չկա կամ ո՞նց կարող է չլինել։ Գոնե Հայաստանի կառավարությունը, այդ թվում  վերջին շրջանում, բավարար միջոցներ է  հատկացրել, որպեսզի գյուղատնտեսական աշխատանքներ իրականացվեն, որպեսզի ԼՂ-ում թոշակները, նպաստները, աշխատավարձերը վճարվեն։ Կարծում եմ՝ ԼՂ կառավարությունն էլ ջանքեր է  գործադրել, որպեսզի հողերը մշակվեն։ Այդ ի՞նչ է ցույց տվել։ Սև խավիար է եղե՞լ, էկզոտիկ ուտելիքներ են եղե՞լ։ Կներեք, որևէ կերպ չեմ ընդունում։ Համաձայն չեմ բացարձակապես այդ շեշտադրումների հետ։

Ժողովուդր ջան, էս ինչի՞ մասին եք խոսում, էս ի՞նչ պատվերով քարոզչություն է։  Ի՞նչ է՝ մենք Ղարաբաղի համար որևէ բան խնայե՞լ ենք։  Ղարաբաղը վերջին 30 տարվա ընթացքում երբեք  Հայաստանից այդքան աջակցություն չի ստացել, ինչքան ստանում է  հիմա։ Մի մտեք այդ թեմաների մեջ։ Ես չհիշեմ, մարդիկ են հիշելու, որ այդ նույն բարբառով բազմում երիտասարդներ պատերազմի օրերին Երևանի սրճարաններում էին։ Ինչո՞ւ եք ընդհանրապես մտնում այդ թեմաների մեջ, ի՞նչ եք ուզում ապացուցել։

Ասում եք կինը... Այսինքն,  ձեր կանխավարկածն այն է, որ մեր տանը  բադիրջան եփվելու իրավունք չկա, հա՞։ Այսինքն, ձեր կանխավարկածն այն է, որ մենք ու Հայաստանում բոլոր մարդիկ պետք է բադիրջան չունենա՞ն։ Կամ Երևանում տրանսպորտ չպետք է լինի՞, որ մարդիկ չկարողանան տուն գնալ։

Սրա տակ թաքնված պրոցես կա։ Հայաստանի ընտրված ղեկավարի հասցեին նման մեղադրանքներ ուղղելով՝ անուղղակի մեղադրանքներ են ուղղվում... Ո՞ւմ հասցեին։ Ի՞նչ ենք ես, իմ ընտանիքը, Հայաստանը, ժողովուրդը խնայել Ղարաբաղի համար։ Էս մունաթն էս ինչի՞ համար է։ Ասում են՝ տներ ենք ձեռք բերել։

Այս ի՞նչ եք անում, այս ի՞նչ պրոցես եք հարուցում, այս ի՞նչ թել եք թելում»։

Փաշինյանն հունից դուրս եկել ու անգամ հաջորդ հարցի ժամանակ կրկին վերադարձավ այս հարցին. «150 միլիարդը ո՞նց են օգտագործել, որ աջափսանդալի մատերիալ չունեն։ Ուրեմն՝ թող գնային բաղչեն վարեին, բարդիջան ցանեին։ Թե՞ դա էլ պետք է Արարատյան դաշտում ցանեին ու ուղարկեին։ Սա ի՞նչ ձև է։ Հերիք եղավ, բոլ եղավ։ Մեկը Շուշիի հերոս է, մեկն Ավարայրի ճակատամարտի հերոս է, ոչ մեկի հետ խոսել չի լինում։ Հետո ադրբեջանցի տեսան, հետները 50-50 գործ էին անում։ Էդ մենք դավաճա՞ն ենք, իրենք էլ ազգային հերո՞ս։ Էն որ Լաչինի միջանցքի երթուղին առանց ՀՀ իշխանության հետ համաձայնեցնելու գնում, փոխում, պայմանավորվում էին, Հայաստանի իշխանությանը դնում փաստի առաջ, այդ ժամանակ չէի՞ն հիշում, դավաճա՞ն էինք, ի՞նչ էինք, այդ ժամանակ ի՞նչ էին մտածում։ Ամեն ինչին չափ ու սահման կա։

Բադրիջան չունեն մարդիկ, 150 միլիարդ գումար ենք տվել, գոնե բադրիջան աճեցրեք առավոտից երեկո լայվ մտնելու փոխարեն։

Ինչ եք ուզո՞ւմ։ Ուզո՞ւմ եք Հայաստանի ինքնիշխանությունը մատաղ անեք։ Ո՞ւմ առաջ եք ուզում մատաղ անել։ Բացառված է դա։ Ասում ա՝ աղջկադ Մոսկվա ես տանում։ Հա, շնչում-արտաշնչում էլ են երեխեքը, ի՞նչ եք ուզում։ Ի՞նչ է նշանակում, որ ԼՂ իշխանության ներկայացուցիչները Երևանում ճանապարհներ են փակում։ Ադրբեջանական գործառո՞ւյթ եք իրականացնում Երևանի կենտրոնում, այդ ինչ ձև է»։