Ձեր վստահելի աղբյուրը

«Ադրբեջանի հետ խաղաղության պայմանագրի ստորագրումը և Թուրքիայի հետ հարաբերությունների կարգավորումն անհրաժեշտություն է այն ընկալմամբ, որ Իրանի և Վրաստանի հետ մեր հարաբերությունները զարգանում են բնականոն կերպով և պետք է շարունակեն զարգանալ»,- ասուլիսում հայտարարեց Նիկոլ Փաշինյանը:

Նա նշեց, որ պատեհ համարեց այսօրվա ասուլիսը սկսել հենց այս ուղերձով՝ հասկանալով, որ Լեռնային Ղարաբաղում (Արցախի Հանրապետություն- խմբ.) հաստատաված հումանիտար ճգնաժամը բարձր էմոցիոնալ ֆոն է  ստեղծել. «Չնայած այս պայմաններում վերը նկարագրված տեսության իրագործումը չի հեշտանում, ռազմավարական առումով կարևոր է ընդգծել  խաղաղության  օրակարագի անփոփոխելիությունը և մեր կառավարության հավատարմությունը այդ օրակարագին։

Արդյո՞ք Հայաստան-Ադրբեջան բանակցությունների օրակարգից Արցախի Հանրապետության հարցը դուրս կգա կամ հակառակը՝ կարգավիճակի հարցն օրակարգ կվերադարձվի

«Հայաստանը ԼՂ ժողովրդի ճակատագիրը չի կարող որոշել այն տրամաբանությամբ, որ Լեռնային Ղարաբաղի  (Արցախի Հանրապետություն- խմբ.) ներկայացուցիչներն իրենք պետք է լինեն բանակցության կողմ։

ԼՂ ժողովրդի իրավունքներն ու անվտանգությունները պետք է քննարկվեն ԼՂ ներկայացուցիչների մասնակցությամբ Բաքու–Ստեփանակերտ երկխոսությամբ` միջազգային մեխանիզմի շրջանակներում։ Սա հնարավորություն է տալիս, որ ԼՂ ժողովուրդը կարողանա բարձրացնել իրենց հուզող հարցերը»։

Ադրբեջանի առաջարկը` Աղդամով Արցախի ժողովրդին օգնություն հասցնելու վերաբերյալ

«Ես ընդհանրապես նման հարց քննարկելու որևէ մանդատ չունեմ, իսկ Լաչինի միջանցքի հետ կապված մանդատ ունեմ, որովհետև այն ստեղծվել է նոյեմբերի 9-ի եռակողմ հայտարարությամբ, որի ստորագրողներից մեկը ես եմ»։ 

Նա նշեց, որ Շառլ Միշելի հայտարարությունն այդ մասին անակնկալ չէր իր համար, բայց ինքը նման հարց չի քննարկել. «Ես չեմ քննարկել, ասել եմ, որ նման հարց  քննարկելու ոչ անհրաժեշտություն, ոչ էլ մանդատ ունեմ»։ 

Վաշինգտոն–Բրյուսել- Մոսկվա` բանակցությունների տեղափոխություն

«Անկախ տեղից՝ բանակցողները չեն փոխվում, բանկցում է Հայաստանն ու Ադրբեջանը։ Բանակցությունում հաջողություն ունենալը մեզ է հարկավոր։ Օրակարգը որևէ ձևով չի փոխվում, սկզբունքային հարցերը որևէ ձևով չեն փոխվում, խոսակցության տրամաբանությունը չի փոխվում»։ 

Մոսկվայում՝ Հայաստան-Ռուսաստան-Ադրբեջան ԱԳ նախարարների այսօրվա հանդիպման մասին

«Ակնկալիք ունեմ ՀՀ ԱԳ նախարարից և, իհարկե, մյուս գործընկերներիցս, որ կկարողանան հնարավոր խաղաղության պայմանագրի ևս մի քանի հոդված համաձայնեցնել և կարողանան ինչ-որ լուծման հասնել Լաչինի միջանցքի բացման հարցում»: 

Խաղաղության պայմանագրի նախագծի ստորագրում

«Ցավոք, ստորագրման փուլին չենք հասել»։

Հնարավոր է Հայաստանը դիմի ՄԱԿ ԱԽ՝ Ադրբեջանի կողմից Արդարադատության միջազգային դատարանի որոշումները չկատարելու հարցով

«ՄԱԿ-ի ԱԽ-ին դիմելը մեր հնարավոր  գործիքակազմի մեջ է և հասկանալիորեն մենք նաև այդ ուղղությամբ ենք աշխատանքներ տանում։

Կապի մեջ ենք ՄԱԿ-ի ԱԽ-ի  մշտական անդամ և ոչ մշտական անդամ հանդիսացող երկրների հետ։ Մենք գտնվում ենք քննարկումների փուլում։

ՄԱԿ-ի ԱԽ դիմելու հարցում  որևէ դժվարություն չկա, կարելի է ուղղակի մի ժամում դիմել ՄԱԿ-ի ԱԽ։ Խնդիրն այն է, թե այդ դիմելու հարցում  որոշում կընդունվի՞, թե՞ չի ընդունվի և եթե ընդունվի, ապա ինչ որոշում կընդունվի։ Այնուամենայնիվ, եկեք չմոռանանք, որ ՄԱԿ-ի ԱԽ-ն Արդարադատության միջազգային դատարանի իմպլեմենտացիոն մարմինն է, բայց նաև չմոռանանք, որ դա քաղաքական մարմին է ու մանավանդ նման հարցով ԱԽ դիմելու  քայլերը պետք է բավարար չափով նախապատրաստված լինի  ու քննարկված լինի անդամ երկրների հետ, ինչը մենք անում ենք»։ 

Արցախի Հանրապետությունից  հնչող դիրքորոշումներն անհասկանալի են Փաշինյանի համար

«Անհասկանալի են Լեռնային Ղարաբաղից հնչող այն դիրքորոշումները, որոնք բացառում են Բաքվի հետ բանակցությունները, քննարկումները, մյուս կողմից հիշատակման են արժանի ԼՂ-ից են հնչում ձայներ, որոնք խոսում են երկխոսության անհրաժեշտության մասին։

Իմ կարծիքով, այս իրավիճակում լավագույն ճանապարհներից մեկն այն է, որ ԼՂ-ն հստակ ու աներկբա պատրաստակամություն հայտնի ԼՀ հայության իրավունքների և անվտանգության հարցը միջազգային մեխանիզմի շրջանակներում քննարկել Բավքի հետ։ Դա շատ կարևոր խնդիր է, այդ թվում նաև միջազգային ընկալման տեսակետից։ Մենք անընդհատ միջազգային հանրությանը ուղեձներ ենք հղում, բայց այս պրոցեսում մի գործողություն բաց ենք թողնում»։

Արայիկ Հարությունյանի հայտարարությունը՝ Արցախի Հարապետությունը աղետի գոտի հայտարարելու մասին 

«Կարելի է  հայտարարել աղետի գոտի, իսկ այդ ճգնաժամը կառավարելու հարցում արդյո՞ք ԼՂ իշխանություններն ունեն որևէ անելիք։ Կարծում եմ՝ բոլոր դեպքերում հենց իշխանություն լինելու բերումով ունեն անելիք, կարծում եմ, այդ անելիքը պետք է անեն, մենք պատրաստ ենք աջակցել այդ անելիքն անելու ուղղությամբ»։ 

Եթե Արցախում ռազմական գործողություններ սկսվեն, ի՞նչ կանի Հայաստանը

«Չեմ ցանկանում նման սցենար քննարկել: Իմ կարծիքն այն է, որ Լեռնային Ղարաբաղում պետք է ռազմական գործողություններ չսկսեն»,- ասաց Փաշինյանը։ Ըստ նրա, միջազգային որոշակի երաշխիքների եւ ներգրավվածության ու աջակցության առկայությունը շատ կարևոր է, որպեսզի առաջադրված նպատակներն ու խնդիրները լուծվեն։

«Հո մենք չենք պատրաստվում ստորագրել ցանկացած փաստաթուղթ, որի վրա գրված է «խաղաղության պայմանագիր»։ Դա մեր ամենամեծ մտահոգությունն է, որ մենք ստորագրենք այնպիսի խաղաղության պայմանագիր, որը խաղաղություն ապահովեի կամ  խաղաղություն ապահովելու հնարավորինս մեծ շանսեր կունենա։ Հակառակ դեպքում, մենք վաղուց ստորագրել էինք այդ խաղաղության պայմանագիրը՝ առանց նրբությունների մեջ խորանալու»,- ասաց Փաշինյանը։

Նա նշեց, որ պարզ է՝ խաղաղության պայմանագիրն ինքնին չի երաշխավորում խաղաղություն, բայց խաղաղության պայմանագրի բացակայությունը կրկնապատկում է  պատերազմի հավականականությունը, դա էլ է փաստ։ 

Հայաստանի Զինված ուժերը պատր՞ստ է հնարավոր պատերազմի դեպքում պաշտպանել Արցախի մեր հայրենակիցների անվտանգությունը

«Կարող է մենք արձանագրենք, որ ՀՀ խնդիրը ՀՀ տարածքային ամբողջականությունը պաշտպանելն է, մենք մնալու ենք այս տրամաբանության մեջ։ Լեռնային Ղարաբաղի անվտանգությունն ապահովելու համար կա պաշտպանության բանակ։ Բայց ընդհանուր առմամբ, ես կարծում եմ, որ ԼՂ անվտանգությունն ապահովելու համար պետք է դիվանագիտական ճանապարհներ օգտագործվեն։

Հայաստանի Զինված ուժերի գործառույթը ՀՀ Սահմանադրությամբ ՀՀ տարածքային ամբողջականությունն ու անվտանգությունն ապահովելն է։

Մենք նոր պատերազմ չենք ուզում, ամեն ինչ պետք է անենք, որ չլինի նոր պատերազմ, Հայաստանի տարածքային ամբողջականությունը վերականագնվի խաղաղ գործընթացի միջոցով»։