Ձեր վստահելի աղբյուրը

Այսօր ՀՀԿ փոխնախագահ Արմեն Աշոտյանի ծննդյան օրն է: Նիկոլ Փաշինյանը մամուլի ասուլիսի ժամանակ շնորհավորեց նրա տարեդարձը, երբ լրագրողը հարց տալու ժամանակ ասաց, որ Աշոտյանի տարեդարձն է:

«Չէ, առանց բանի, մարդու ծննդյան օրն է, բոլոր այն մարդկանց, ում ծննդյան օրն այսօր է, շնորհավորում եմ»,- ասաց Փաշինյանը:

Լրագրողը հարց հնչեցրեց կալանավորված Վանաձորի նախկին քաղաքապետ Մամիկոն Ասլանյանի, պաշտպանության նախկին նախարար Դավիթ Տոնոյանի, ՊԲ նախկին հրամանատար Միքայել Արզումանյանի, գեներալ Գրիգորի Խաչատուրովի, Արմեն  Աշոտյանի գործերի մասին՝ ասելով, որ  «այս ամենի հանրագումարում ստեղծվում է  պատկեր, որ ձեր իշխանության օրոք երկրի կառավարությունն է որոշում ով նստի, ով չնստի, անկախ նրանից՝ հանցագործություն կատարել է, թե ոչ, կամ ինչ ծանրության հանցագործություն է  արել»։

Փաշինյանը անեկդոտ պատմեց՝ ներողություն խնդրելով բոլոր այն մարդկանցից, ում անունը Սպարտակ է. «Մեկը  մեկին հարցնում է՝ անունդ ի՞նչ է, ասում է՝ Սպարտակ, ասում է՝  ինչի դու ո՞ր թիվ ես»:

Հիմա դուք, որ պատմում եք, ո՞ր թվի մասին եք պատմում: Լրիվ «սպարտակի թվի» պատմություն եք պատմում»։

Լրագրողն ասաց, որ 2018 թվականից հետո տեղի ունեցած կալանավորումներ են, Փաշինյանն արձագանքեց. «Լրիվ «սպարտակի պատմությունն է», որովհետև դուք «սպարտակի թվի» պատմություն եք պատմում»։

«Աշոտյանը «սպարտակի թվի՞ն» է կալանավորվել», - հարցրեց լրագրողը։  Փաշինյանն  էլ ծիծաղելով ասաց՝ չէ:

«Նրանք, ովքեր կալանավորվել են, «սպարտակի թվի» հետ ոչ մի կապ չունեն։ Ես ի՞նչ կապ ունեմ այդ ամեն ինչի հետ։ Ոչ մեկի մեղքն ապացուցված չէ, քանի դեռ չկա մեղադրական դատավճիռ։ Ես ինչ մեկնաբանեմ ձեր ասածը։

Մարդը ԵՊՀ գումարները ծախսելով, ենթադրենք, իր համար սեփականություն է ձեռք բերել կամ մի որևէ քաղաքում հանրային տարածքները սեփականաշնորհվել են, կամ բանակին ժամկետանց հրթիռներ են մատակարարվել:

Բացառվում է, որ այդ մարդիկ լինեն քաղբանտարկյալ։ Բա-ցառ-վում է»,-  ասաց Փաշինյանը։ 

Այնուհետև հնչեց հաջորդ հարցը, նա ընդհատեց ու ասաց. «Հա, իմիջայլոց, բոլորին էլ առողջություն եմ մաղթում, ասածիս մեջ ոչ մի բան չկա»։