Ձեր վստահելի աղբյուրը

«Պատասխանատու զգում եմ այսօր ստեղծված իրավիճակի համար, հրաժարական տվել եմ, չեմ պատրաստվում ամեն օր և անընդհատ հրաժարական տալ»,- այսօր տեղի ունեցած ասուլիսում  հայտարարեց Նիկոլ Փաշինյանը՝ պատասխանելով արցախցու հարցին, թե կարո՞ղ է արդյոք քաղաքական կամք դրսևորել և հրաժարական տալ։

Նշենք, որ ասուլիսի ժամանակ լրագրողները որոշ արցախցիների հնարավորություն տվեցին նաև իրենց հարցերն ուղղել Փաշինյանին։

Մասնավորապես, 44-օրյա պատերազմի մասնակից, Շուշիի բնակիչ Միքայել Առաքելյանի հարցն՝ ուղղված Նիկոլ Փաշինյանին, հետևյալն էր․

«Արցախը ճանաչեցիք Ադրբեջանի անբաժանելի մաս՝ մեզ ենթարկելով բլոկադայի, հումանիտար ճգնաժամի, որտեղ սովից երեխաներ են մահանում և կան 120 հազար արցախահայության ցեղասպանության վտանգ։ Դուք Ձեզ պատասխանատու չե՞ք զգում, Ձեր խիղճը Ձեզ չի՞ տանջում և Դուք կարո՞ղ եք արդյոք քաղաքական կամք դրսևորել և հրաժարական տալ, քանի որ բերել եք հասարակության պառակտում, բանակցությունների տապալում, պատերազմ, խայտառակ պարտություն, մեր հայրենիքի 80 տոկոսի և Շուշիի հանձնում։ Հարց՝ ո՞վ եք դուք, անհաջող քաղաքական գործիչ, թե դավաճան, միթե՞ չեք հասկանում, որ մենք ճկվում ենք, բայց չենք կոտրվում, միթե Դուք չե՞ք վախենում արժանանալ Մելիք Ֆրանգյուլի ճակատագրին, որի գերեզմանը բոլորն են անպատվում»։

Լրագրողը, որը ներկայացրեց արցախցու հարցը, դիմելով Փաշինյանին՝ ասաց, որ հարցին պատասխանելիս՝ ԼՂ-ի փոխարեն օգտագործի Արցախ տերմինը։

«Արցախ, թե Լեռնային Ղարաբաղ։ Մենք անընդհատ խոսում ենք միջազգային տերմինաբանությունից և նոյեմբերի 9-ի եռակողմ հայտարարության կարևոր դրույթներից մեկն այն էր, որ այնտեղ ֆիքսվեց Լեռնային Ղարաբաղ եզրույթը։ Դրանից հետո շատ ժամանակ չանցած Ադրբեջանի նախագահը հայտարարեց, որ ԼՂ չկա ու մի հրաշքով, այդ թվում հայկական իրականության մեջ շատ մարդիկ սկսեցին ենթարկվել այդ հրովարտակին՝ սկսելով չօգտագործել ԼՂ տերմինը։ Հետո խոսում ենք միջազգային դիրքորոշումների մասին, ԼՂ հայության իրավուքների պաշտպանության մասին, ԼՂ միջազգային սուբյեկտության մասին։

Ես ասում եմ Լեռնային Ղարաբաղ, քանի որ կարող եմ միջազգային հանրությանը բացատրել, թե դա ինչ է նշանակում։ Երբ ինչ-որ մարդիկ ԼՂ հասկացության օգտագործման մեջ տեսնում են դավադրություն ու օգտագործում՝ Արցախ-Արցախ, նրանք իրենց դիրքորոշումը համապատասխանեցնում են Ադրբեջանի պաշտոնական դիրքորոշման հետ։ Ասեք Արցախ, հետո՞։ Արցախի Սահմանադրության մեջ գրված է ԼՂ։ Հո կենացով չի՞։

Այդ մեր հարգելի ընկերն ասում է՝ մենք անկոտրում ենք, կներեք՝ մի ստիպեք ինձ ամեն անգամ հիշել 2020 թ-ի սեպտեմբերի 28-ին առաջացած խցանումների մասին՝ Ստեփանակերտից դեպի Երևան։ Ասում են Շուշին հանձնել եք, ասում ենք՝ կհետաքննենք, հետո քրգործ ենք հարուցում, կալանավորում ենք, հետո գալիս ասում եք, թե այս մարդիկ քաղբանտարկյալ են։ Դավաճանական կառավարությո՞ւն ենք, ուրեմն՝ հրաժարվեք դավաճանական կառավարության աջակցությունից։ Ինչու չեն հրաժարվում դավաճանից փող ստանալուց, գիտե՞ք ինչքան կենացներ եմ լսել, անձամբ ճանաչում եմ նման կենաց ասողների, ովքեր պատերազմի ժամանակ 300-ի տակ ճողոպրում էին, թող ոչ մեկին չթվա, թե Ղարաբաղի ակցենտով խոսելը, նշանակում է լինել հերոս»,- ասաց Նիկոլ Փաշինյանը։

Լրագրողն այս խոսքից հետո արձագանքեց՝ նշելով, որ այսօր Արցախի ցանկացած բնակիչ հերոս է, սովամահ են լինում, բայց շարունակում են մնալ Արցախում, ավելին, գրանցվել են երեխաների մահվան դեպքեր։ «Յուրաքանչյուր արցախահայի մասին խոսեք հարգանքով կամ էլ ցույց տվեք վճիռներ, թե ովքեր են մարտի դաշտից փախել»,- ասաց լրագրողը։ «Երևի կլինեն վճիռներ, ոչ մեկի անմեղության կանխավարկածը չեմ խախտում»,- ի պատասխան նշեց Փաշինյանը։

Ինչ վերաբերում է արցախցու այն հարցին, թե արդյոք չի վախենում Մելիք Ֆրանգյուլի ճակատագրին արժանանալուց, Փաշինյանն արձագանքեց․«Ես ընդհանրապես ոչ մի բանից  չեմ վախենում, վախենում եմ մեր կողմից կայացրած և կայացնելիք սխալ որոշումների համար։ Եթե իմ կենսագրությունը գիտեք, ուրեմն՝ իմ վախերի չափերն էլ գիտեք»։